Тыва кышка 68 хуу белен

Тываның муниципалдыг тургузугларының күскү-кышкы одалга үезинге белеткелин республика Чазааның оперативтиг штавының ээлчеглиг хуралынга көрген. Штабтың даргазы – Тыва Республиканың Чазааның Даргазының оралакчызы Олег Лукин одалга-энергетика комплекизиниң, чуртталга-коммунал ажыл-агыйының болгаш социал адырның объектилери дээш харыысалгалыг  яамылар удуртукчуларының илеткелдерин дыңнаан.

Одалга-энергетика яамызының медээзи-биле алырга, ниитизи-биле объектилерниң кышка белени бөгүн 68 хуу. Албан черлериниң аайы-биле алырга:

- Одалга-энергетика комплекстиң объектилери - («Россети Тываэнерго», Кызылдың ЧЭТ, ТЭК-4 БК, котельнаялар, «Дизель» КХН) – 59%,

- Чуртталга-коммунал ажыл-агыйы (чуртталга фондузу, суг хандырылгазы) – 78,7%, 

– Социал адыр (Тываның Өөредилге яамызының, Күш-ажыл яамызының, Кадык камгалал яамызының, Культура яамызының база Спорт яамызының албан черлери) – 66,6%.

Энергетиктерниң дыңнатканы-биле алырга, ниитизи-биле кышка белеткел үезинге1062 хемчегни планнаан, ооң 636-зы, азы ажылдың 62 хуузу доозулган, оон аңгыда 426 аңгы-аңгы техниктиг ажылдарны доозуп турар.

Олег Лукин соңгу чүкче чедирилгези-биле сөөртүп турар хөмүр-даштың шынарынга база доктааган. Ол одаар чүүлдүң шынарын дүжүрериниң мурнунда хынап, хүлээп алган дугайында актыны албан тургузуп, бадыткаарын чагырга даргаларынга чагаан.

Ужуражылганың киржикчилери чылыг хандырылга объектилеринге дүрген дуза чедирер өөредилгени база сайгарган. Муниципалдыг тургузуглар аразындан Барыын-Хемчик база Таңды кожууннар белеткелди чоруткан. Арткан кожууннарга өөредилгени эрттирерин оперативтиг штабтың хайгааралында алган.