«Оргаадай» КБК удуртукчузу Эрес Мандан-оол Тываның көдээ ажыл-агыйының алдарлыг ажылдакчызы болган

Сураглыг көдээ ажыл-агый ажылдакчызы Эрес Мандан-оол "Тыва Республиканың көдээ ажыл-агыйының алдарлыг ажылдакчызы" хүндүлүг атка төлептиг болган. Национал хөгжүм-шии театрынга эрткен Республика хүнүнге тураскааткан байырлыг хемчег үезинде хүндүлүг атты аңаа тывыскан.

Эрес Лопсанчапович күш-ажылчы базымын 1978 чылда «АТКШ-тиң 25 чылы» совхозка эгелээн. 2006 чылдан эгелеп ачазы, акызы-биле кады бодунуң хуу бүдүрүлгези – «Оргаадай» кооперативти организастааш, удурткан. Күш-ажыл болгаш билдилиг удуртулга үре-түңнелди берген: бүдүрүлге көдээ ажыл-агый бүдүрүлгезиниң хемчээлин чылдың-на улгаттырып, бодунуң бүдүргени бедик шынарлыг аъш-чем продукциязынга тус черниң чурттакчы чонунуң хереглелин хандырып турар. “Оргаадайның” тыва далганы болгаш холумактыг чеми республикада болгаш оон дашкаар билдингир.

Көдээ ажыл-агый кооперативи кожууннар болгаш регионнар аразында делгелгелер болгаш ярмаркаларның доктаамал киржикчизи. Эрткен чылдарда ооң продукциязын Моолче болгаш Казахстанче чедиишкинниг үндүр сөөртүп турар. А 2022 чылда «Оргаадайның» бүдүрген «Тыва далган» деп хоорган тараадан продукциязы «Россияның 100 эң эки барааннары» мөөрейниң диплом эдилекчизи болган.

Кооператив көдээ ажыл-агый продукциязындан аңгыда, чаңгыс чер чурттугларының хереглелинге тудуг материалдарын кылып база бажың тудуун бүдүрүп турар.

«Бизнес - дыштаныр хүннер-даа, шөлээ-даа, шалың-даа чок, дыка берге ажыл. Кичээнгейни болгаш тура-сорукту негээр ажыл-дыр. Сайгарлыкчы кижи бодунуң сорулгазынга чедер дээш, медаль чедип алыр дээн спортчу ышкаш, хүннүң-не ажылдаар ужурлуг - деп, Эрес Мандан-оол бодунуң бир интервьюзунда журналист кижиниң чедиишкининиң чажыды чүдел дээн айтырыынга харыылаан. - Шыдамык чорук болгаш тура-сорук – чедиишкинниң кол дөзү. Силерниң күзеп турарыңар азы төлептиг шалыңыңарны бодуңардан өске кым-даа бербес».

Тываның чурттакчылары Эрес Мандан-оолду рынок үезинде чедиишкинниг ажылдап чоруур идепкейлиг, шыырак удуртукчу деп билир.