Владислав Ховалыг «Тыва командазы – 2030» аныяктар шуулганының киржикчилери-биле чугаалашкан

Тываның Баштыңы Владислав Ховалыг «Тываның командазы - 2030» деп аныяктарның өөредилге шуулганының киржикчилери-биле ужурашкан. Бо неделяда Москвага ажылчын сургакчылаашкынындан чанып келген дораан, Алдын-Булак этнокультура комплекизинде чылдың-на эртип турар лидерлер чыыжынга чеде берген.

Регионнуң Баштыңы уругларга аян-чоруктуң кол түңнелдерин база экономиканың аңгы-аңгы адырларының темпизин бедидер дээн республика чазааның ниитизи-биле чорудуп турар ажылын, ол ышкаш федералдыг чазактың болгаш Президент Владимир Путинниң республикага көргүзүп турар деткимчелерин таныштырган.

Владислав Ховалыг социал четкилерде блогунда ужуражылганың дугайында чугаалап тура, регионнуң амгы бүгү айтырыгларынга аныяктарның ханы сонуургалын, республикада болгаш чуртта чүү болуп турарын эки билирин демдеглээн. «Аныяктар республиканың келир үези дээш аарып, үени эки билип турар – деп, Баштың демдеглээн. – Сайзыраңгай Тывага чурттаар дизе, аныяктарны дыңнаары чугула».

Шуулганның киржикчилери регионнуң бирги удуртукчузундан эпчоксунмайн чидиг айтырыгларны салып, экономика адырларынга – туризм база көдээ ажыл-агыйындан эгелээш, иннвовациялыг педагогикага, өөредилгеге, ооң иштинде тыва дылга чурагай технологияларын ажыглаарынга хамаарыштыр боттарының бодалдары-биле үлешкен.

Ужуражылга үезинде аныяктар чүгле республика Баштыңындан эвес, а Россияның Маадырлары – тускай шериг операциязының киржикчилеринден айтырыгларны салган. Алдын-Булакка Владислав Ховалыг-биле кады Тывада билдингир маадырлар Мерген Донгак, Буян Куулар база Чалым Чульдум-оол келген. Дайынчылар фронтудан боттарының төөгүзүн аныяктар-биле үлешкен.

«Мындыг ужуражылгаларны эрттирери кончуг чугула. Ада-чуртка ынакшыл болгаш патриотчу хей-аътка аныяктарны кижизидери, Төрээн чуртувустуң чаагай чоруунче оларның салым-чаяанын, арга-шыдалын угландырар арганы бээр» - деп, Владислав Ховалыг бодунуң блогунда демдеглээн.

Бо чылын «Тываның командазы — 2030» шуулганы республикадан база Россияның регионнарындан чүс хире аныяктарны чыгган. Чаңчыл езугаар чогаадыкчы болгаш өөредиглиг солун программаларны белеткээн. Сөөлгү хүнде 36 социал болгаш бизнес төлевилелдерни камгалаан. Төлевилелдер шупту солун болганын, ынчалза-даа патриотчу угланыышкынныг, өг-бүле үнелелин нептередиринче, кадыы багай уругларны деткииринче угланган төлевлелдерже онза кичээнгей угланганын организаторлар демдеглээн. Эгелекчи саналдарын чедиишкинниг камгалаан аныяктар ону боттандырар грантыларны алыр.