Тываның Баштыңы республика хүнүнде күрүне шаңналдарын тывыскан

Тываның Национал театрынга Тыва Республика Хүнүнге тураскаткан байырлыг хемчег болуп эрткен.

Регионнуң Баштыңы Владислав Ховалыг чыылганнарга Тываның кол национал байырлалы – Республика хүнү-биле байырны чедирген. Бо хүн республиканың чурттакчылары төөгүлүг сактыышкынны кылып, ада-өгбелериниң өнчү-салгалын кадагалап арттырарынга база Тываның тургустунганының болгаш хөгжүлдезиниң эгезинге чораан кижилерниң мөгейип турарын ол демдеглээн.

«103 чыл бурунгаар тургустунган бот-догуннаан тыва күрүне ону албан езузу-биле хүлээп ап, бүгү талазы-биле деткээн хөй националдыг Россиядан быжыг деткимчени алган. Тыва Арат Республика бодунуң ээлчээнде Ада-чурттуң Улуг дайынының үезинде Совет Эвилелиниң баштайгы эвилелчизи апарып, чоннуң күзел-соруу-биле 80 чыл бурунгаар улуг чурттуң составынче кирген» — деп, Тываның Баштыңы чугаалаан.

Ол чылдарда Тыва амыдыралдың шупту адырлары чаартынып, күрүне тургузуундан төөгүзүг арга-дуржулганы алганын демдеглээн. Өгбелерниң хүлээп алганы шиитпири бодунуң чону дээш харыысалгалыын бо хүнде бадыткаан.

«Амгы үеде чугула чүүл – Россияның чонунуң чаңгыс демнии болгаш Төрээн чуртун камгалаар талазы-биле кады күжениишкиннер амгы үеде эң чугула. Бистиң чаңгыс чер-чурттугларывыс, Тускай шериг операциязының киржикчилери бистиң чаңгыс чер чурттугларывыс Ада-чурттуң Улуг дайынының чылдарында Кызыл Шеригни кызыл-кош-биле деткип турганы ышкаш, чуртувусту камгалап турарлар. Бөгүн бүгү Тыва шериг албанныгларга болгаш оларның өг-бүлелеринге, Россияның терроризмге таварышкан чаа регионнарынга дузалап турар. Президентиниң, федералдыг чазактың болгаш «Чаңгыс демниг Россия» партияның деткимчези-биле экономиктиг чаартылгалар болуп, чаа чугула инфраструктураны тудар темп эки бар. Эрткен хонуктарда республиканың 2030 чылга чедир тускай хөгжүлде программазын Москвага камгалап алдывыс, ону ам-даа боттандырар бис деп дыңнадыйн» - деп, Владислав Ховалыг түңнээн.

Оон Россия Федерацияның база Тыва Республиканың күрүне шаңналдарын тыпсыр байырлыг езулал болган.

Россия Федерациязының Президентизиниң Чарлыы-биле «Ада-чурттуң мурнунга ачы-хавыяазы дээш» орденниң II чергезиниң медалы-биле күш-культура болгаш спорт адырында ачы-хавыяазы болгаш хөй чылдарда ак сеткилидг ажылы дээш Тыва Республиканың сумога чыынды командазының кол тренери Кандемир Кууларны шаңнаан.

Тыва Республиканың Баштыңының айтыышкыны-биле, Россияның Социал фондузунуң Тыва Республикада салбырның ажылдакчызы Наталья Зыкованы база Росгвардияның Тыва Республикаа эргелелиниң улуг өпертөлээзи, улуг лейтенант Сылдыс Кууларны Өөрүп четтириишкин бижии-биле шаңнаан.

«Кызыл аэропортунуң» кол бухгалтери Ольга Ненашевага, Виктор Көк-оол аттыг хөгжүм-шии театрының директорнуң оралакчызы Айдын Монгушка Тыва Республиканың Баштыңының Хүндүлел бжиктерин тывыскан.

Хүндүлүг аттарны дараазында ажылдакчыларга тывыскан :

- «Тыва Республиканың алдарлыг ажылдакчызы» — «Россияның почтазы» федералдыг почта харылзаазының Тыва Республикада эргелелиниң директору Владимир Ревенкога;

- «Тыва Республиканың алдарлыг журнализи» — «Тыва» КТРК-ның программалар башкарыкчызы Дарий Хомушкуга;

- «Тыва Республиканың культуразының алдарлыг ажылдакчызы» — Тоора-Хемниң ургуларның уран чүүл школазының чурулга башкызы Алефтине Акка;

- «Тыва Республиканың эртеминиң алдарлыг ажылдакчызы» — Тыва Республиканың эмчи-социал айтырыглар болгаш башкарылга эртем-шинчилел институдунуң улуг эртем ажылдакчызы Валерий Шиирипейге;

- «Тыва Республиканың алдарлыг эмчизи» — республиканың 1 дугаар эмнелгезиниң анестезиология болгаш реанимация төвүнүң анестезиолог-реаниматолог эмчизи Алимаа Кужугетке;

- «Тыва Республиканың көдээ ажыл-агыйының алдарлыг ажылдакчызы» — Улуг-Хем кожууннуң Арыг-Үзүү сумузунуң «Оргаадай» көдээ ажыл-агый кооперативиниң даргазы Эрес Мандан-оолга тывыскан.

МЕДСИ №2 клиниктиг эмнелгениң травматолог-ортопед эмчизи Вячеслав Ондарны «Тыва Республиканың мурнунга ачы-хавыяазы дээш» Тыва Республиканың медалы; Тываның партия болгаш хөй-ниити ажылдакчызы, төөгү эртемнериниң кандидады Алдын-оол Канзайны «Буян-Бадыргы» орденниң III чергези-биле шаңнаан.

«Россияның почтазы» федералдыг почта харылзаазының Тыва Республикада эргелелиниң директору Владимир Ревенко ооң ажылынга бедик үненелди бергени дээш өөрүп четтиргенин илереткен.

«Бо шаңналды алганымга өөрүп тур мен. Ол чүгле меңээ эвес, а бистиң бүдүн командавыска хамааржыр деп санаар мен. Бо өөрүшкүнү мээң-биле үлешкен коллегаларымга сеткилимниң ханызындан четтиргеним илередип тур мен. Республиканың чаагай чоруун болгаш чечектелиишкинин бедидеринге бистиң моон соңгааргы ажылывыс идиглиг болур дээрзинге бүзүрээр мен» - деп, Владимир Ревенко чугаалаан.

Тываның национал оркестри, Т.Дулуш аттыг үрер хөгжүм оркестри, «Саяннар» национал ыры-танцы театры, “Тыва” ансамбли, Орус культура төвү, Тегшээ Цеценделгер биле Елена Куулар, Марина Климина биле "Кызыгааржылар" ансамбли, Карина Ховалыг болгаш өскелер-даа байырлал концертинге киришкен.