Тываның Арга-арыг яамызы: Уургайлыг аржаанында байдал контрольда

Таңды кожуунда Уургайлыг аржаанның дыштанылга баазазының чоогунче өрттүң чоокшулуп келгени-биле, аржаанчыларны өскээр чайладып көжүрген.

Аржаандан көжүрген 82 кижиниң 48-зин Таңды кожууннуң Бай-Хаак суур чоогунда спорт комплекске чыттырган. Арткан кижилер машиналар-биле чанган. Кижилерни айыыл-халаптан чайлаткан.

Баш бурунгаар дыңнадыгдан алырга, 3 га черге өрт үнген. Авиаарга-арыг камгалалының, Россияның ОБЯ Тывада кол эргелелиниң 13 дугаарлыг өрт-камгалал кезээниң өртчүлери база техниказы өрттү өжүрүшкен.

"Өрттү өжүреринге 57 кижи киришкен. 11 кижи – Таңды кожууннуң Бай-Хаак суурда өрт албанының ажылдакчылары, 35 кижи – кожууннуң эки турачы дружина командазы, 11 кижи Тываның арга-арыг яамызының төлээлери . 11 санныг техниканы хаара туткан. Байдалды контрольда алган, чурттакчылыг черлерни айыылдан чайлаткан" – деп, Тываның арга-арыг болгаш бойдус сайыды Григорий Ондар дыңнаткан.

"Успенка, Межегей, Дүрген, Бай-Хаак сумуларның эки турачы улусчу дружиналары, ол ышкаш Таңдының арга-арыг ажыл-агый чери, Тываның Көдээ ажыл-агый яамызының ажылдакчылары ажылдаан. Бии-Хем кожууннуң арга-арыг чери ам дузалажып келир – деп, Таңды кожуун чагырга даргазының албан хүлээлгезин күүседип турар Владимир Сырат чугаалаан. – Электри четкилери, экономика объектилери, чурттакчылыг черлер айыылдан камгалаттынган".