Тываның Баштыңы Россияның көдээ ажыл-агый сайыды Лут-биле ужурашкан

Россияның Көдээ ажыл-агый яамызынга Тываның Баштыңы Владислав Ховалыг биле федералдыг сайыт Оксана Лут ужурашкан. Республиканың агроүлетпүр комплекизин хөгжүдериниң чугула айтырыгларын ийи тала чугаалашкан.

«Шээр малдың баш саны-биле чуртта чеди, а Сибирьде бирги черде бис. Кызыгаар чоогунга хамааржыр регион болганывыста, эпизоотиктиг байдалды бодум контролюмда тудуп турар мен. Дотациялыг бюджеттиг-даа болзувусса, 2024 чылда ол угланыышкында акшаладырыышкынны улгаттырып, 330 млн рубль чедир көвүдеткен бис» - деп, регионнуң удуртукчузу ужуражылга соонда бижээн.

Республика өшкү малдың баш саны-биле чуртта база бирги черде – 263 муң баш, ол дээрге Сибирьде өшкү бажының 62% база чуртта – 16 хуузу-дур. Тыва совет дүктүг ангор өшкү уксаазын камгалап арттырап алган Россияда чаңгыс ажыл-агый болур, российжи делгелгелерде доктаамал шаңналдыг черлерни ап турары – аңаа бадыткал. Мал ажыл-агыйында эки шимчээшкинни көргеш, малдарның, ылаңгыя хойларның баш санын чизелээр ажылды «Хорриот» системага күштелдирерин ведомствога демдеглээн.

Россияның Көдээ ажыл-агый яамызы Тываның аграржыларын чогуур курлавырлар-биле хандырганының база ажаалда кампаниязының амгы чорудуунуң дугайында илеткелди кичээнгейлиг дыңнаан. АҮК бүдүрүлгелеринге күрүнеден көргүзүп турар деткимчени база чугаалашкан. Бо чылда республикага федералдыг бюджеттен 1 хире млрд рубль көрдүнгенин дыңнаткан.

Оксана Лут биле Владислав Ховалыг көдээ девискээрлерни комплекстиг хөгжүдер күрүне программазын боттандырар айтырыгларны база көрген. Беш чыл дургузунда Тывага 2 млрд ажыг рубльди тускайлаан, ооң 900 ажыг млн-ин бо чылда. Көдээ суурлар чоок кавын хөгжүдериниң узун хуусаалыг планнарын, ооң иштинде кол чуртталга пунктуларын тодарадырын база сайгарып көргеннер.