Тывага “Маадырлар чарыжы” деп шаптараазыннарлыг чарышка республика чемпионады бир дугаар эртер

Август 16-да, Советтиг Тываның 5 чылы аттыг стадионга, “Маадырлар чарыжы” деп шаптараазыннарлыг чарышка республика чемпионады бир дугаар болуп эртер.

«Маадырлар чарыжы» – Ксения Шойгунуң тургусканы болгаш удуртуп турары «Маадырлар лигазы» деп федералдыг төлевилел болур. Лиганың төлээлери профессионал спортчу төлевилелдерни бүгү чуртта бир дугаар организастап турар.

Экстремалдыг спортка ынактар ийленчек черде 100 метрниң шаптараазыннарын, 1,5 метрже өрү көдүрүлген херимни, доора дургаар салган четкилерни, хол-биле кылашты, 2 метр бедик херимни дээш, дыка хөй моондактарны эртер.

«Шаптараазыннарлыг оруктарны инструкторлар чогаадып кылган. Онзагай комплексти албан-биле Москвадан республикада эккелген. Ооң соонда күзелдиг кижи бүрүзү маргылдаалаарда ону ажыглап болур. Маргылдаага киржир чагыглар хүннүң-не кирип турар, бо хүнде оларның саны 40 ашкан.
Август 16-да спортчуларны болгаш оларның деткикчилер бөлүктерин стадион манап турар. Тура-сорукту болгаш шыдамык чорукту көргүскен маргылдаа солун, чидиг болуру чугаажок» - деп, шаптараазыннарлыг чарыш федерациязының даргазы Аяс Монге чугаалаан.

Чарышка киржирин бүрүткедирде дараазында https://gonkituva.ru (https://clck.ru/3CSR76) шөлүгже кире бээр.