Тываның арга-арыг девискээрлеринде онза байдал чурумун соксаткан

Тываның Баштыңы Владислав Ховалыг ооң дугайында бөгүн чарлаан.
Кургаг болгаш изиг агаардан арга-арыгга өрт айыылы улгатканындан регионнуң удуртукчузу 2024 чылдың август 4-те Тываның девискээринде арга-арыгларга регионалдыг деңнелдиг онза байдал чурумун кииргенин сагындыраал. Ол хүн республика девискээринде 23 өрт хып турган. Арга-арыг өрттерин өжүрер хөделиишкинни дүүштерин чазактың ОБК онааган.

«Агаар-бойдус болгаш агаардан арга-арыг камгалалының ажылдакчыларының билдилиг ажылы тургустунган байдалды дүрген чавырылдырар» - деп, Владислав Ховалыг бодунуң соцчеткилеринге дыңнаткан.

Тываның өртчүлеринге арга-арыг өрттерин өжүржүр дээш Забайкалье, Бурят, Хакас республикалардан, Красноярск крайдан авиаарга-арыг камгалал албаннарындан 76 кижи чедип келген. Онза байдалды чарлаан үеден эгелээш, хып турган өрттерниң 17-зин неделя дургузунда төндүр өжүрүшкен.

Тываның Баштыңы дилегге харыылаан коллегалары – регион удуртукчуларынга болгаш өртчүлерниң боттарынга четтиргенин илереткен. Келген специалистер бөгүнде элээн нарын байдалдыг Таңды биле Чеди-Хөл кожууннарда өрттерни өжүржүп турар. Арга-дуржулгалыг специалистерниң мергежээн хөделиишкиннери база чагган чаъстар байдалды чавырылдырар деп, Владислав Ховалыг демдеглээн.

Регионалдыг диспетчер албанының медээзи-биле алырга, август 12-де Тываның Каа-Хем, Таңды, Чеди-Хөл база Улуг-Хем кожууннарда арга-арыг фондузунуң черлеринде ниитизи-биле 2343, 70 га шөлдүг 14 арга-арыг өрттери хып турар. Кызыл биле Таңдының арга-арыг ажыл-агыйларында 528,50 га шөлде 2 өрттү өжүрген. Эрткен хүнде Тожу биле Туранның арга-арыг ажыл-агыйларында 3 өрттү өжүрген.

Арга-арыг өрттерин өжүреринге 216 кижини база 18 санныг техниканы хаара туткан.

Метеорологтар бөгүн республикага 30 градус чедир изиирин, чер-черлерге хаттың күжү секундада 17-22 метр чедип, чаңныктап, долу дүжер чадавас деп дыңнаткан. Бай-Тайга, Каа-Хем база Эрзин кожууннар девискээринге 4-кү класстың өрт айыылы улуг.