Тыва «Ужудукчу чок ужар системалар» чаа национал төлевилел-биле ужудукчу чок хамааты ужар чүүлдер санын көвүдедир

Сибирь федералдыг округда РФ-тиң Президентизиниң бүрүн эргелиг төлээзи Анатолий Серышевтиң удуртулгазы-биле эрткен хуралда «Ужудукчу чок ужар системалар» национал төлевилелдиң округтуң регионнарындан боттаныышкынын сайгарып чугаалашкан. Россияның президентизи Владимир Путинниң идип үндүргени национал төлевилелди ол бодунуң хууда контролюнда алган.

Национал төлевилелдиң сорулгазы – ужудукчу чок хамааты ужар чүүлдерни ажыглаар долу адырны тургузуп, ооң бүдүрүлгезинге технологтуг бот-догуннаашкынын чедип алыр. Округтуң шупту регионнары Россияның Президентизниң даалгаларын күүседип эгелээн деп, Анатолий Серышев демдеглээн. 2024 чылда ада-чурттуң ужудукчу чок ужар аппараттар сайзыралынче база хереглелдерни деткииринче СФО регионнарынга федералдыг бюджеттен 3,3 хире млн рубльди үндүрери планнаттынган деп, бүрүн эргелиг төлээ чугаалаан. 

Национал төлевилелдиң эң-не капитал киирилделиг ажылы – ужудукчу чок ужар авиация системаларының технологияларын сайзырадыр талазы-биле регионалдыг эртем-шинчилел болгаш бүдүрүлге төптерин тургузары. Новосибирск биле Иркутск областарда оларны тургузары-биле идепкейлиг ажылдар чоруп турар, а Томск облазында ындыг төптү бо чыл төнчүзүнде ажыдар. Ужудукчу чок системалар-биле ажылдаарынга лицензиялыг өөредилгени Сибирь федералдыг округта 40 өөредилге төптери чорудуп турар.

Бо чылдың мартта “Ада-чурттуң ужудукчу чок авиация системаларынга хереглелди хандырары” федералдыг төлевилелдиң удуртукчузу – Россияның Үлетпүр болгаш садыглаашкын яамызы-биле чарган керээ езугаар республиканың Арга-арыг ажыл-агыйы болгаш бойдус ажыглалының яамызы Тывада регионалдыг төлевилелди удуртуп башкарар. Бистиң республика 2024 чылдың төнчүзүнге чедир ужудукчу чок ужар 13 аппаратты садып алыр. Тываның Арга-арыг яамызының удртулгазында албан черлеринге ол системаларны үлээр. Адырның специалистери аппараттарны башкарарынга өөредилгени эртер.

Республикада арга-арыг ажыл-агыйынга болгаш арга-арыг өрттериниң байдалын үргүлчү хайгаараарынга, чедери берге черлерге өрттер болу берген таварылгада харылзааның шынарын экижидеринге, айыыл-халаптарны чайладырынга үезинде информацияны дамчыдып, шиитпирлерни дүрген хүлээп алырга ужудукчу чок ужар чүүлдерни ажыглаар. Оон аңгыда, арга-арыг хайгааралынче чарыгдалдарны камнап, агаардан база патрульдаашкын шынарын экижидип, өрттер өжүрерде информация дамчыдылгазын дүргедедир.

Ниитизи-биле алырга, Сибирьниң регионнарында национал төлевилелдиң шугуму-биле 2024 чылдың ийиги чартыында арга-арыг ажыл-агыйының хереглелдеринге дээш 168 БПЛА-ны садып алыры көрдүнген.