Мөңгүн-Тайга кожуунга сарлыкчылар фестивалы болуп эрткен

Мөңгүн-Тайга кожуунга сарлыкчылар фестивалы болуп эрткен. Тыва Республиканың Баштыңының грантызы-биле деткээн солун хемчег регионнар аразында кылдыр бир дугаар эрткен. Мөңгүн-Тайгаже Бурятиядан, Алтай Республикадан база кожа Моолдан аалчылар келген. Фестивальды Тыва Арат Республиканың ССРЭ-ниң составынче эки тура-биле киргенинден бээр 80 чыл оюнга база Россия Федерациязының болгаш Тыва Республиканың көдээ ажыл-агыйының алдарлыг ажылдакчызы, Тыва Республиканың Күш-ажылдың Маадыры Өшкү-Саар Аракчааевна Ооржактың 80 харлаанынга тураскаадып эрттирген.

“… сарлыктарның болгаш сарлыкчыларның болгаш сарлыктың өңгүр чараш байырлалы - тыва сарлыктарны азырап өстүрерин салгалдан салгалче кызымаккай күш-ажылы-биле дамчыдып чоруур бистиң мөңгүн-тайгажыларның чонувусту амыдыралында эң кол болуушкуннарның бирээзи апарган” – деп, Тываның Баштыңы Владислав Ховалыг социал четкилерде бодунуң блогунда бижээн. Төрээн черинге кызыгаар чок ынакшылы база мерген угааны, ол ышкаш Россияның болгаш Тываның чаагай чоруу дээш хоочуннуң кызымаккай күш-ажылын болгаш сарлык ажыл-агыйын хөгжүдеринге улуг үлүг-хуузун демдеглеп, Өшкү-Саар Аракчааевна Ооржакка өөрүп четтириишкинниң сөстерин илереткен.

Владислав Ховалыг кадыг-дошкун агаар бойдустуг черде ажыл-ижин салбайн, ховар болгаш үнелиг продукцияны бүдүрүп чоруур эрес-дидим база улуг хей-аъттыг мөңгүн-тайгажыларны онзалап демдеглээн. Сарлык ажыл-агыйын адыр чедир хөгжүдүп, сарлык малдың баш санын көвүдедир талазы-биле ам-даа кады кылыр ажылдар мурнувуста деп регионнуң удуртукчузу чугаалаан.

Фестивальдың программазы ийи хүн чымыштыг эрткен. Бирги хүнде аът чарыжы, чартык марафон, кара адар маргылдаа, кожууннуң малчыннарының аразынга хүреш болуп эрткен. РЭА АЭМ арктиктиг шинчилелдер төвүнден, Москваның физиктиг-техниктиг институдундан, Тываның эртем ниитилежилгезинден башкарыкчы эртемденнер болгаш специалистерниң киржилгези-биле “Сарлык ажыл-агыйының амгы байдалы болгаш келир үези” деп эртем-шинчилел конференциязы болуп эрткен. Киржикчилер сарлык ажыл-агыйында амгы үениң технологияларындан эгелээш мал ажылының ол угланыышкынын хөгжүдериниң перспектвиларын калбаа-биле сайгарып чугаалашкан. Ол-ла хүн кожууннуң сарлыкчыларын болгаш хоочуннарны байырлыг байдалга шаңнап-мактаан.

Фестивальдың эң солун көрүштүг кезээ – сарлык чарыжынга 40 хире мунукчу киришкен.

Байырлалдың киржикчилеринге болгаш аалчыларынга өглер хоорайжыгажын тип, сүттен болгаш эъттен кылган аъш-чем аймаан делгеп садып, ус шеверлерниң дүктен янзы-бүрү кылыгларын сонуургаткан.