Тываның ажыл-агыйларында кышкы мал чеминиң белеткели уламчылавышаан

09.08.2024

Оперативтиг штабтың хуралында хову ажылдарын база чеминиң белеткелин сайгарып чугаалашкан. Тываның Чазааның даргазының оралакчызы Алик Монгуштуң удуртканы хуралга регионалдыг көдээ ажыл-агый яамызы, ветеринария албаны база кожууннарның көдээ ажыл-агый эргелелдери олурушкан.

Эрткен чылдың бо үезинге деңнээрге, бо чылын сиген кезилдези ийи катап шалыпкын чоруп, 6 муң хире гектардан 6 муң ажыг тонна мал чемин белеткээн, хову ажылдарынче 17 кожууннуң 10-у киргенин көдээ ажыл-агый сайыды Юрий Оруспай илеткээн. Хожудап турар кожууннар ажыл чок кижилерни база студентилерни хаара туткаш ажылды дүргедедирин, кезип алган сигенни өртке удур айыыл чок чорукту сагып, шыгжап, кадагалаарын сайыт чагаан.

Муниципалдыг болгаш республика курлавырын чогуур мал чеми-биле четчелээрин Алик Монгуш кожуун чагырга даргаларынга сагындырган. Көдээ ажыл-агый эргелелдериниң специалистери мал чеми белеткээр планын Көдээ ажыл-агый яамызы-биле дүүштүрер. Чижээ, Бай-Тайга кожуун - 40, Өвүр – 105, Кызыл биле Бии-Хем кожууннар 100-100 тоаннаы белетээрин хүлээнген.

Оперштаб хуралының төнчүзүнде, муниципалдыг курлавыр сигенин санаваска, 10 муң ажыг дүрүг сиген белеткээр даалганы Көдээ ажыл-агый яамызында берген. Суурларда сигенчилер бригадаларының даңзызын тургузуп, бир гектарда ажылдың төлевирин чурттакчы чонга дүрген дыңнадыр даалганы база онааган.