Тыва УЧК террорисчи халдаашкынындан когараан Курск облазының чурттакчыларын хүлээп алырынга белен

Август 6-да Курск облаазы Украинаның чепсектиг күштериниң оор халдаашкынындан когараан. Украинаның Чепсектиг күштериниң бир муң хире кижи санныг шериглери Курск облазының Суджа районунуң девискээринде участокту эжелеп алыр сорулгалыг халдаан. 31 кижи, ооң аразында алды бичии уруг     кемдеп-когараан. Областың тайбың дөрт чурттакчызы мөчээн, ол хире кижиниң байдалы аар.

Күрүне кызыгаарында кезектерниң кызыгааржылар база быжыглаашкын бөлүктери-биле кады демниг хөделип, авиация, ракета шериглери болгаш артиллериядан адыышкыннарны бергенинден дайзын Курск угланыышкынынче хандыр кирип шыдаваан. Россияның Камгалал яамызының дыңнатканы-биле, «Север» шериг бөлүүнүң кезектери Россияның ФАА органнары-биле кады российжи-украин кызыгаарда чыдар Курск облазының Суджа база Коренево районнарында УЧК арткан шериг бөлүктерин узуткаан.

Курск облазынче УЧК халдаашкынының соонда Россияның Истелге комитеди терроржу акт, өлүрүүшкүн, хоойлуга удур ок-чепсек ажыглааны, корум-чурум камгалаар органнар ажылдакчыларының амы-тынынче халдааны дээш, элээн каш чүүлдерге даянгаш, кеземче херектерин оттурган.

Россияның Президентизи Владимир Путин УЧК халдаашкынын «улуг чөңгээлээшкин-дир» деп демдеглээн. Күрүне баштыңының даалгазы езугаар областың чурттакчыларынга эргежок дузаламчыны көргүзер даалганы чазакка болгаш элээн каш хамааты ведомстволарга берген.

Севастопольдан Астрахань облазынга чедир дузаны көрүзеринге беленин Россияның дыка хөй регионнарның Баштыңнары дыңнаткан. Москва, Санкт-Петербург, Белгород база өске-даа хоорайлар регионче эмчилер, камгалакчылар база волонтерларны чоруткан. Регионда 3 муң хире кижини өскээр чайладып көжүрген, түр үеде чурттадыр пунктуларда бир муң ажыг кижини чыттырган.

Тыва өске регионнар-биле деңге, Курск облазының чурттакчыларынга дузаны көргүзеринге беленин дыңнаткан. Республика Баштыңы Владислав Ховалыгның даалгазы езугаар элээн каш шиитпирлер хүлээп алдынган, бир дугаарында айыыл-халапка таварышкан регионче гуманитарлыг дузаны чоруткан. Курск хоорайның чурттакчыларынга деткимчениң сөстерин база айыыл-халапка таварышкан улуска дуза чедиреринге беленин бистиң республиканың чурттакчылары социал четкилерде илередип турар.

«Сөөлгү медээлер дээш чаңгыс чер-чурттугларымның сагыш човаашкынынга база катап бүзүредим. Өскениң ажыг-шүжүү деп чүве бисте чок. Хөй националдыг Тываның болгаш бодумнуң өмүнээмден Курск облазының чурттакчыларынга деткимчениң сөстерин илередип тур мен. Тайбың чурттакчыларны аткан дайзынның дерзии аргаларын буруу шаптым. Дээди кол командылакчы, чурттуң президентизи область бүгү талазы-биле деткимчени алыр деп дыңнаткан. Кады шупту чүвени ажып эрте бээр бис!» -деп, Тываның Баштыңы Владислав Ховалыг чугаалаан.

«Чаңгыс демниг Россия» партияның регионалдыг салбыры гуманитарлыг чүък чыылдазын болгаш чедирилгезин организастаан. Ол ышкаш республика бюджединден саң-хөө дузазын тускайлаар. Оон аңгыда, бистиң республика Курск облазындан өскээр чайладып көжүрген чурттакчыларны хүлээп алырынга белен.