Тывада таарымчалыг хоорай хүрээлеңин хевирлээриниң объектилери кидин түлүк туттунуп турар

“Чурттаар оран-сава болгаш хоорай хүрээлеңи” президентиниң национал төлевилелиниң “Таарымчалыг хоорай хүрээлеңин хевирлээри” күрүне программазы-биле каш-ла чыл дургузунда Тывада 140 ажыг сесерликтерни, парктарны, уруглар болгаш спорт шөлдерин база стадионнарны эде чаарткан. Бо чылын хөй-ниити дыштанылгазының 30 черин чаартырынче ТХХХ төлевилелдер күүселдезинче 102 ажыг млн рубльди үндүрген.

Ак-Довурак, Чадаана база Шагаан-Арыг хоорайларда, Шекпээр, Ийме, Шеми, Өөк, Адыр-Кежиг суурларда, Чеди-Хөл, Тес-Хем, Өвүр, Тере-Хөл база Бай-Тайга кожууннарда 14 объектиде ажылдар доозулган.

Сарыг-Септе, Мөңгүн-Тайга, Сүт-Хөл, Таңды, Эрзин кожууннарда 16 объектиде ажылдар уламчылавышаан, а Кызылдың 12 дугаар школа чанында «Алдар аллеязы» арай саадап турар. Тываның Чазааның Даргазының оралакчызы Олег Лукинниң удуртулгазы-биле эрткен тудуг штавының неделя хуралында, ол объектилерде ажылдарның саадаан чылдагааннарын тодарадып, удуртулга шиитпирин үндүрген.

Чадаанада «Тос кожуун төвү» база Ак-Довурактың Центральная кудумчузунда «Ак тоолчургу чугаа» дыштанылга черлериниң эде чаартылгазы эң улуг чаагайжыдылга объектилериниң санында. Республиканың ийи хоорайының дөзевилел төлевилелдери биче хоорайларга таарымчалыг хоорай хүрээлелин тургузар бүгү-российжи төлевилелдер мөөрейинге тиилээнин сагындыраал.

Чөөн-Хемчик кожуун чагыргазының медеглээни болза, Чадаанага тудар шөлде чер участогун планнааш, кадып кургаан болгаш аарыг ыяштарны кезип, ыяш-дажын, дазылдарын аштап, эрги объектилерни база чадыгларны адырып, арыглаашкынны чоруткан.

Ак-Довуракта Культура ордузунуң баарында брусчатканы адырып, уруглар ойнаар шөлдү эде-хере тырттып эгелээн. Абакандан тудуг материалдарын – брусчатка, бетон плиталарны, бордюр даштарны база биче хевирниң архитектура дүрзүлерин садып эккелген. Чадаана хоорайдан сай-дашты база элезинни сөөртүп турар.