CЭКП тыва обкомунуң бирги секретары Григорий Ширшин 90 харлаанын демдеглеп турар

Көскү күрүне ажылдакчызы, Тыва Республика Ордениниң ийи дакпыр эдилекчизи, СЭКП тыва обкомунуң бирги секретары Григорий Ширшин 90 харлаан юбилейин демдеглеп эрттирип турар.

Глава Республиканың Баштыңы Владислав Ховалыг Тываның социал-экономиктиг хөгжүлдезинге киирген улуг үлүг-хуузу дээш четтиргениниң сөстерин күрүне албанының хоочунунга дамчыткан.

Силерниң кайгамчык 90 харлаан юбилейиңер ССРЭ-ниң хүрээлеңинге Тыва Арат Республиканың эки тура-биле бактаап киргениниң 80 чылдаанының байырлалында чугула болуушкун болур. Сеткилим ханызындан эң-не чылыг чымчак байыр чедириишкинерин хүлээп ап көрүңер! Узун назынны база быжыг кадыкшылды күзедим. Силерниң сүмелериңер, мерген чагыгларыңар биске дыка херек» - деп, регионнуң удуртукчузу демдеглээн.

Григорий Чоодуевич 1973 чылда СЭКП обкомунуң бирги секретарынга томуйлаткаш, 18 чыл ажыр республиканы удурткан. Ол чылдарда Тываның экономиказынче үш миллиард рубльди салган, ийи миллион дөрбелчин метр чуртталга шөлү, культура бажыңнары болгаш эмнелгелер, техникумнар ажыглалче кирген, 32 муң өөреникчиге школалар, 12 муң уругга ясли садтар туттунган. Григорий Чоодуевичиниң ажылдаан үезинде «Тывадаг-дүгү» комбинат (бирги ээлчээ), мелькомбинат база «Тудугкезээ» комбинат, эът база сүт комбинаттары, машина заводу база дааранылга фабриказы ажыглалче кирген. Кызылды амга чедир каастап, чонунга баран бооп чоруур Хөгжүм-шии театры, Чурукчулар бажыңы база Парлалга бажыңы база ынчан туттунган.

Григорий Чоодуевичиниң 90 харлаан юбилейин республика деңнелинде демдеглеп эрттирип турар. Август 7-де Кызылда Улусчу чогаадылга бажыңынга эртер байырлыг хуралда ооң күш-ажылчы болгаш амыдырылчы оруунга тураскааткан делгелгени, концерт көргүзүүн бараалгадып, шаңналдарны тыпсыр. Тываның көскү күрүне ажылдакчызының юбилейин ооң хөй санныг эш-өөрү болгаш үежилери, коллегалары, чоок болгаш төрээн кижилери кады демдеглээр.