Тываның Баштыңы ДУР-нуң удуртулгазы-биле ужурашкан

ТР-ниң Баштыңы Владислав Ховалыг Луганск болгаш Донецк Улус республикаларда ажылчын сургакчылаашкынын уламчылавышаан. Ол ДУР-нуң Чазак Даргазы Евгений Соловьев-биле ужурашкан. Ужуражылга үезинде ийи удуртукчу элээн каш айтырыгларны сайгарып чугаалашкан. Бир чугаалашкан айтырыы Донбассты хостаарынга тыва дайынчыларның киирген үлүг-хуузун мөңгежидериниң дугайында болган.

«ДУР-нуң девискээринде дайынчы хөделиишкиннер уламчылап-даа турза, Донецкиде боолар дааштаашкынының дыңналыры эвээжеп турар. Россияның армиязы дайзынны сы базып турар. Тайбың чуртталга эглип эгелээн. Хоорайда тудуг ажылдары, коммуникацияларда болгаш оруктарда улуг септелгелер чоруп турар. Ында мээң чаңгыс чер чурттугларым – тыва шериглерниң үлүү база бар» - деп Владислав Ховалыг демдеглээн.

Ол ышкаш тываларның дайын шөлүнге эрес-дидим чоруунуң дугайында Донецк Улус республиканың удуртулгазы эки билир дээрзин губернатор демдеглээн.

Бо чылдың февраль айда хостаткан Авдеевкага Россияның Камгалал яамызының болгаш Тываның туктарын 55-ки гвардейжи бригаданың шериглери киискиткен.

«Ол болуушкунга тураскаалдыг атты тыпсыр арганы кады ажылдап кылырын дугуруштувус. Ол ышкаш, ДУР-нуң удуртулгазы Донбасс дээш тулчуушкунга шылгарааннарга боттарының шаңналдарын тыпсырын, ооң иштинде «ДУР-нуң Маадыры» деп атка төлептиг кандидатураларны көөрүнге белен» - деп Владислав Ховалыг чугаалаан.