Владислав Ховалыг Донбасска сургакчылап чорааш Тывадан дайынчыларга ачы-буян чүъгүн дамчыдып берген

Тываның Баштыңы Владислав Ховалыг ажыл-агый аайы-биле Луганск Улус Республикага чорааш, тускай шериг операциязының үезинде дайынчы даалгалар күүседип турар Тыва Республикадан шериглер-биле ужурашкан.

«Шупту чүвени Тиилелгеге дээш!» бүгү-российжи төлевилел күүселдези-биле «Улусчу фронт» хөй-ниити шимчээшкининиң деткип чыгганы ээлчеглиг ачы-буян чүъгүн чедиргеш, мурнуку шугумда дайынчыларга дамчыткан. Свердловскга автомашиналарны, даг мотоциклдерин, квадроциклди база өске-даа тускай техниканы болгаш волонтерларның өрүп аргааны камгалал четкилерин чедире берген. Тыва оолдарның албан хүлээлге эрттирип турар шериг кезектеринче техника база тускай дериг-херекселдер аймаан улаштыр дамчыдар.

«Ээлчеглиг чаа чүъктү чыып белеткээринге киришкен шупту кижилерге четтиргеним илереттим. Республиканың чонундан база бистиң дайынчыларывыстан четтиргенивисти дамчыдып тур мен. Бо бүгү Тиилелгени чоокшуладырынга дузалаар!» - деп, Владислав Ховалыг социал четкилерде бодунуң блогунда бижээн.

Регионнуң удуртукчузу дайынчылар-биле ужурашкаш, оларны кичээнгейлиг дыңнап, дилеглерин демдеглеп алган. Оолдарның хөй кезииниң дилээ – фронтуда тулчуп турар солдаттарның өг-бүлелеринге чогуур бүгү деткимчени көргүзерин аазаан.

Владислав Ховалыг ол чорааш, ЛУР-нуң Свердловск муниципалдыг округтуң Баштыңы болур коллегазы Андрей Сухачев-биле кады Червонопартизанск хоорайда №15 «Спутник» ясли-садта капитал септелге ажылдарын хынааннар. Россияның шупту регионнарының чаа девискээрлерге чорудуп турары шефтээшкин ажылының бир кезээ кылдыр Тываның деткимчези-биле школа назыны четпээн уруглар албан чериниң капиталдыг септелгези чоруп турар. Бистиң республиканың киржилгези-биле 1957 чылда туткан яслиде чаа котельнаяны тургузуп, одалга системазын солуп турар. Тус черниң 57 чаштарын бо күзүн таарымчалыг байдалдар уткуп алыр.
Эрткен чылын Тываның күжү-биле ЛУР-да ниити өөредилге школазының спорт залы септеттингенин сагындыраал.

«Бистиң үлүг-хуувусту чон-даа, тус черниң эрге-чагыргазы-даа үнелеп турары эки-дир» - деп Владислав Ховалыг демдеглээш, свердловчуларга Тыва ам-даа дузалажырын чугаалаан.