Закрыть
Логин:
Пароль:
Забыли свой пароль?
Войти    

Тываның Баштыңы «Үстүү-Хүрээ» фестивалының бирги хүнүнде аалдап четкен

Тываның Баштыңы «Үстүү-Хүрээ» фестивалының бирги хүнүнде аалдап четкен 10.07.2024

Тываның Баштыңы Владислав Ховалыг фестивальдың бирги хүнүнде чедип, үрде манааны хөгжүм байырлалының катап эгелээни-биле киржикчилерге болгаш аалчыларга байырын чедирген. Хүндүлүг аалчы кылдыр бүрүткеткеш, хемчегниң киржикчилеринге ужурашканы ол.

Элээн дыштанган соонда ажылын катап эгелээн фестивальда Россияның хоорайларындан, ол ышкаш Австралия, Австрия база Великобританиядан хөгжүмчүлер келген.

- «Үстүү-Хүрээ» дириг хөгжүм болгаш чүдүлгениң фестивалы мынча хөй эш-өөрлүг болганынга өөрүп тур мен! Элээн үзүктелиишкин соонда, фестивалывысты катап эгелээнивис бо. Фестиваль шынап-ла боду тускай, дөмейлешпес, катаптаттынмас сүлде-сүзүктүг. Чогаадыкчы чоруктуң болгаш бүзүрелдиң хей-ады. Шупту киржикчилерге болгаш аалчыларга бедик сеткил-хөөннү, хүндүлээчел Тывага үеңерни солун болгаш уттундурбас кылдыр эрттирериңерни күзедим! - деп Владислав Ховалыг фестивальдың киржикчилеринге чугаалаан.

Фестивальдың директору Игорь Дулуш Тываның Баштыңының быжыг тура-соруктуг шиитпириниң ачызында, беш чыл болбаан «Үстүү-Хүрээ» дириг хөгжүм болгаш чүдүлгениң XXI фестивалы ажылын эгелээнин онзалап демдеглээн.

Майгын хоорайжыгажын ооң мурнунда ышкаш Чадаана хоорайның чоогунда аргада тиккен. Ооң девискээринде Интернет ажылдап турар, айыыл чок чорукту видеохайгаарал база полиция ажылдакчылары хондур-хүндезир хандырган.

Киржикчилерниң кол мөөрей хүнү июль 10-да болуп эртер. Ол ышкаш чаңчыл болу берген “Хороо” чыскаалы, киржикчилерниң болгаш аалчыларның түңнел концерти бөгүн болур.


Июль 11-де «Үстүү-Хүрээ» дириг хөгжүм болгаш чүдүлгениң XXI фестивалының тиилекчилерин шаңнап-мактап, гала-концертти бараалгадыр.

Бо чылын фестивальдың киржикчилеринге онлайн-бүрүткелди бир дугаар организастаан. «Үстүү-Хүрээ-2024»-ке киржир бүрүткелди база автомашина эрттирер чөпшээрелди https://www.ustuhure.tuva24.ru/ шөлүлгеден ап болур.

Возврат к списку