Закрыть
Логин:
Пароль:
Забыли свой пароль?
Войти    

Кызылда ча адарынга Россия чемпионады эгелээн

Кызылда ча адарынга Россия чемпионады эгелээн 09.07.2024 Советтиг Тываның 5 чылы аттыг стадионга ча адарынга Россия чемпионадының байырлыг ажыдыышкыны болуп эрткен. Россияның 20 ажыг регионундан 300 хире спортчу ча адарынга Россия чемпионадының тиилекчизи ат дээш үш хонуктуң дургузунда мөөрейлежир.

Тываның Баштыңы Владислав Ховалыг спортчу байырлалдың ажыдыышкынында, российжи деңнелдиг маргылдааның республикада эрттирип турары – спорттуң бо хевирин регионга сайзырадырынга база аныяк салгалга спортчу улуг бедиктерже идигни бээринге онзагай арга-дыр деп демдеглээн.

Владислав Ховалыг маргылдааны ажыдар мурнуу чарыында, Россияның ча адарынга федерация президентизи Владимир Ешеев база Россияның чыынды командазының начальниги Мария Ларькина-биле ужурашкан. Аалчылар спорттуң бо хевирин хөгжүдер талазы-биле республиканың күжениишкиннеринге эки үнелелди бергеннер. Ийи тала федерацияның шугуму-биле спортчу инфраструктураны хөгжүдер аргаларны чугаалажып, чогуур дугуржулгага аттарны салыр күзелин илереткеннер.

- Тывада ча адар спортта алды чүс ажыг кижи хаара туттунган. Оларның көвей кезии аңгы-аңгы деңнелдиг мөөрейлерге эки көргүзүглиг. Бистиң тыва чоннуң эрткен көшкүн амыдыралы, тыва школаның ужур-чаңчылдары спорттуң олимпийжи бо хевиринге улуг салдарлыг болган» - деп, Владислав Ховалыг Россияның ча адар федерациязының удуртулгазы-биле ужурашканының соонда, социал четкилерде бижээн.

Мөөрейниң киржикчилери команда аайы-биле чыскаалып эрткеш, тыва спорттуң бо чараш хевири-биле холбашкан культуразын болгаш төөгүзүн бараалгаткан оюн көргүзүгнү сонуургаан.

Владислав Ховалыг чемпионатты байырлыы-биле ажыдып тура, Россияның ча адарынга чыынды командазының кежигүннеринге күрүне шаңналдарын тывыскан.

Россияның чыынды командаларының спортчу белеткел төвүнүң ча адарынга Россияның чыынды командазының начальниги Игорь Борисович Крыловка күш-культура болгаш спорт адырында хөй чылдарда ак сеткилдиг ажылы дээш Тываның Баштыңының Өөрүп четтириишкинин чарлаан.

Россияның чыынды командаларының спортчу белеткел төвүнүң ча адарынга Россияның чыынды командазының улуг тренери Галина Николаевна Шадринага, Россияның чыынды командаларының спортчу белеткел төвүнүң ча адарынга Россияның чыынды командазының улуг тренери Станислав Вячеславович Забродскийге күш-культура болгаш спорт адырында хөй чылдарда ак сеткилдиг ажылы дээш Тыва Республиканың Баштыңының Хүндүлел бижиктерин тывыскан.

Россия Федерациязының ча адар федерациязының президентизи, Россияның чыынды командаларының спортчу белеткел төвүнүң кол тренери Владимир Ешеевке «Тыва Республиканың мурнунга ачы-хавыяазы дээш» медальды тывыскан.

Тываның Баштыңы маргылдааның киржикчилеринге чедиишкиннерни болгаш тиилелгелерни күзээн.

Возврат к списку