Закрыть
Логин:
Пароль:
Забыли свой пароль?
Войти    

Айдыс Сынааны Тыва Республиканың Чазак Даргазының оралакчызы албан-дужаалды күүседир кылдыр томуйлаан

Айдыс Сынааны Тыва Республиканың Чазак Даргазының оралакчызы албан-дужаалды күүседир кылдыр томуйлаан 05.07.2024

Бөгүн Тываның Баштыңы Владислав Ховалыг Айдыс Сынааны Тыва Республиканың Чазак даргазының оралакчызы албан-дужаалды күүседир кылдыр томуйлаар дугайында чарлыкка атты салган. Ол Виталий Бартына-Садыны солуур.

«Тыва Республиканың Баштыңынга улуг бүзүрел дээш четтиргеним илереттим. Бирги чергениң айтырыгларын чугаалаштывыс. Интернет-мөлчүкчүлерге удур профилактиканы күштелдирер. Комплекстиг хемчеглерни ап, бистиң чаңгыс чер чурттугларывыстың хөй түңнүг акша чээлилерин долдурткан кем-херектерден когараар таварылгаларны болдурбазын чедип алыр. Уругларны болгаш элээдилерни күчүлеп-күштээринден база эр-херээжен чоруктан камгалаарының чаа арга-хевирлерин социал адырда коллегалар-биле кады ажылдап кылыр. Аңаа хамаарыштыр ниитилелде улуг негелде барын республика Баштыңы онзалап демдеглээн» - деп, Айдыс Сынаа чугаалаан.

Бөгүн Айдыс Сынаа вице-премьер Орлан Сарыглар-биле кады Тес-Хем кожуунда хыналда болгаш профилактика хемчеглерин чорудуп турар. О-Шынаа суурнуң чурттакчызының назы четпээн уруун күштээн дугайында билдириишкининге эгеки истелге ажылы эгелээн. Ол доосту бээрге, кеземче херээн оттурарынга эрге-хоойлу шиитпири хүлээп алдынар.

Регионда чажыт арага садыглаашкынында хамаарылгалыг республика база муниципалдыг албан черлериниң албан-дужаалдыг кижилерин база оларның чоок төрелдерин илередип тывар база оларга онааштыр хемчеглер хүлээп алыр ажылды чаа оралакчының мурнунда салдынган.

База ол ышкаш арага садар адырда хоойлужудулга негелделерин сайгарлыкчы чорук субъектилериниң сагып турарын контрольдаар адырда контроль-хыналда ажылдарын чорудар бүрүн эргелиг күрүне эрге-чагырга органнарының ажылын чурумчудар.

Сынаа Айдыс Валериевич 1985 чылдың март 21-де Тыва АССР-ниң Эрзин районнуң Бай-Даг суурга төрүттүнген. 2007 чылда Россияның ИХЯ-ның Барнаулдуң юридиктиг институдун, 2014 чылда – Россияның шүүгү академиязын дооскан. Истелге, прокуратура органнарынга, оон Тыва Республиканың күүсекчи эрге-чагырга органнарынга ажылдаан. Болчукчу ажылды база чоруткан. Биче болгаш ортумак сайгарлыкчы чоруктуң «Опора России» бүгү-российжи хөй-ниити организациязының Тываның регионалдыг салбырын удуртуп турган. Бо үеге чедир Тыва Республиканың Баштыңының Администрациязының база Тыва Республиканың Чазак Аппарадының Регионалдыг айыыл чок чорук департаментизиниң удуртукчузу албан-дужаалга ажылдап турган.


Возврат к списку