Закрыть
Логин:
Пароль:
Забыли свой пароль?
Войти    

Июль 6-дан 11-ге чедир Тывага Россияның ча адарынга чемпионады болуп эртер

   Июль 6-дан  11-ге чедир Тывага Россияның ча адарынга  чемпионады болуп эртер 04.07.2024

Июньнуң 6-11 хүннеринде, Советтиг Тываның 5 чылы аттыг стадионга, ча адарынга бүгү-российжи маргылдаа болуп эртер. Чурттуң 23 регионундан 250 хире спортчулар, тренерлер, судьялар база Россияның ча адар федерациязының төлээлери кээп киржир. Тываны 20 спортчу төлээлээр.

Республиканың Баштыңы Владислав Ховалыг чурттуң кол маргылдаазы регионга спорттуң ук хевирин сайзырадырынга идигни бээр ужурлуг деп санап турар.

- Тыва спортчу үш кол оюннуң бирээзинге ча адары хамааржыр. Тыва мерген адыгжыларның часпас адарының дугайында тоолчургу чугаалар хөй. Бо бүгү доктаамал болгаш шыңгыы белеткелдерниң ачызында чедип алдынары билдингир – деп, республика баштыңы чемпионатка хамаарыштыр чугаалаан.

Маргылдааның хүндүлүг аалчылары - Россияның ча спортунуң федерация президентизи Владимир Ешеев, Россияның чыынды командазының улуг тренерлери Галина Шадрина биле Станислав Забродский, Россияның чыынды командазының начальниги Игорь Крылов, Россияның чыынды командазының начальниги, чиңгине секретары Мария Ларкина, Россияның аныяктарның чыынды командазының күүсекчи директору, улуг тренер Зорикто Манханов олар Тывада чедип келген.

Ча спортунда российжи деңнелдиг улуг маргылдаа Тывада бир дугаар эртип турар. Эрткен чүс чылдың 60 чылдарында республикага ча адар спорт сайзырап эгелээн. Бо үениң дургузунда 60 спорт мастери, делегей чергелиг ийи спорт мастери, бир алдарлыг спорт мастери үнген. Тываның адыгжылары аңгы-аңгы деңнелдиг: Россияның, ССРЭ-ниң, Европаның болгаш делегейниң бирги черлери дээш маргылдааларга база чемпионаттарга чемпионнап, шаңналдыг черлерни алгылаан. Тыва АССР-ниң херээжен спортчуларының чыынды командазы доктаамал шаңналдыг черлерни ээлеп турган.

1985 чылда Елена Достай (Тутатчикова) Европаның Бирги чери дээш маргылдаага тиилээш, делегей ареназынче үнген. Ооң соонда чылдарда ол ССРЭ, ХКД, Россия, Европа болгаш делегей чемпионаттарынга чаңгыс эвес катап тиилеп, шаңналдыг черлерже кирген. Ол ийи олимпий оюннарының (1996, 2004) киржикчизи. Сонамаа Куулар Европаның бирги чери, делегейниң бирги чери дээш маргылдааларга тиилээн. Артыш Чулдум  - элээдилер ортузунга Европа Кубогунуң тиилекчизи болгаш призеру, делегейниң бирги чери дээш маргылдааның чемпиону.

Тыва Республиканың Спорт яамызының спорт школаларының 15 тренериниң удуртулгазы-биле Тываның чыынды командазында 429 спортчу белеткелди эртип турар.

 


Возврат к списку