Дайынчы хөделиишкиннер маадырлары бирги спортчу оюннарга күжүн шенешкеннер

02.07.2024 Бөгүн спортчу хевирлерге тулган дээн спортчуну илереткен Ада-чурт камгалакчызының оюннары болуп эрткен. Дайынчы хөделиишкиннер хоочуннары “Ада-чурт камгалакчызының кубогу” күш-культуржу бөлүк хемчеглерге күжүн шенешкен.

Тожу, Барыын-Хемчик, Бай-Тайга, Чөөн-Хемчик, Сүт-Хөл, Чаа-Хөл, Улуг-Хем, Чеди-Хөл, Каа-Хем, Таңды база Кызыл кожууннар командалары киришкен. Кызыл хоорайның 2 командазының бирээзинде чүгле чаңгыс херээжен спортчу бар.

Маргылдаа киржикчилери 6 спортчу хевирге маргышкан. Стадионга армрестлинг, пауэрлифтинг, стол теннизи, ча адарынга маргылдаалар болган. А эрик кыдыынга – кросс чарыжынга, ДОСААФ-тың баазазынга – боодалга адарынга күжүн шенешкен.

Маргылдааның түңнели-биле спортчулар дараазында черлерни ээлээн.
Стол теннизинге Чөөн-Хемчик командазындан Шолбан Ооржак чемпионнаан. Ийиги черни Кызыл кожууннуң төлээзи Виктор Найдан-оол ээлээн. Үшкү черни Чаа-Хөл кожуундан Арслан Матпак-Кара алган.
65 кил чедир деңзилиг спортчулар аразынга Чөөн-Хемчиктен Руслан Ооржак пауэрлифтингиге тулган чемпион атты чедип алган.

Пауэрлифтингиге 70 кил деңзилиг спортчулар аразынга бирги черни – Чөөн-Хемчик кожуундан Дамдын Саян чемпион, Каа-Хем кожуундан Чингис Бодаган ийиги, Чеди-Хөл кожуундан Кудерек Оюн үшкү черни ээлээн.
Пауэрлифтингиге 76 килден өрү, аар деңзилиг спортчулар аразынга Куулар Айдыс (Сүт-Хөл кожуун) алдын медальды, Хомушку Чингис (Кызыл хоорай) мөңгүн, Чеди-Хөлден Ондар Чимит хүлер медальды чаалап алган.

Армрестлинг (туруп алгаш): Каа-Хем кожуундан Орлан Монгуш бирги, Сүт-Хөл кожуундан Орлан Сарыглар ийиги, Чеди-Хөлден Артыш Соян үшкү черни ээлээн.
Армрестлингиге (олуруп алгаш) тулган чемпион атты Чөөн-Хемчиктен Серенчап Чойган-оол чаалап алган.

40-55 харлыг хоочун маңчылар аразынга 2 километр хемчээлдиг чарышка Кызыл хоорайдан Монгуш Уран-оол бир дугаарында маңнап келгеш, чемпион атты алган. Сүт-Хөлден Аяс Монгуш ийи дугаарында келген болза, үшкү черге Чаа-Хөлден Арслан Матпак-Кара төлептиг болган.

18-39 харлыг аныяктар ортузунга 3 километр хемчээлдиг чадаг чарышка Чаа-Хөл кожуундан Субудай Ооржак чемпионнаан. Чөөн-Хемчиктен Руслан Ооржак ийиги, Ак-Довурак хоорайдан Эдуард Монгуш үшкү черни алган.

Ча адар маргылдаага Кызыл хоорайдан Айдын Эртине, Кызыл кожуундан Виктор Найдан-оол база Аяс Монгуш тергиидээннер. А боодалга адарынга Эренчин Ооржак (Кызыл кожуун), Кежик Мургу (Бай-Тайга), Самба Дорбет (Чаа-Хөл) эң хөй саннарны адып, тиилекчилер санынче кирген.