Закрыть
Логин:
Пароль:
Забыли свой пароль?
Войти    

МАСС Азияның делегей маршруттарының четкизинче «Россия – Моол – Кыдат» чурттар аразының оруун киирерин деткээн

МАСС Азияның делегей маршруттарының четкизинче «Россия – Моол – Кыдат» чурттар аразының оруун киирерин деткээн 20.06.2024

Тываның Баштыңы Владислав Ховалыг Новосибирск хоорайда XI делегейниң Сибирь транспорт шуулганында киржип турар.
Шуулганның ажылы-биле «Сибирь дугуржулгазы» регионнар аразының ассоциациязының (МАСС) координация чөвүлелиниң хуралын Владислав Ховалыг удуртуп эрттирген. Чөвүлелдиң сайгарган кол темазының бирээзи – Тываны таварты эртер чурттар аразының транспорт коридору болган.

МАСС Азияның делегей маршруттарының четкизинче «Красноярск – Абакан – Хандагайты – Моол – Кыдат» автомобиль оруун киирер дээнин деткээн деп, Тываның Баштыңы социал четкилерде бодунуң блогунда дыңнаткан. «Кыдатче угланган Россияның амгы ажыл-агыйжы болгаш геополитиктиг байдалын тода көргүзүп турар – деп, Владислав Ховалыг тайылбырлаан. – Ам төлевилелди Россия-Моол-Кыдаттың чазактар аразының транспорт болгаш логистика адырының талазы-биле комиссиязынга сайгарып көөр кылдыр киирери чугула».

Тыва Республиканы таварты чаа автомобиль, демир-орук болгаш авиа-угланыышкыннарлыг «Россия – Моол – Кыдат» чурттар аразының коридорун тургузар дээн бистиң регионнуң үжен хире өске-даа хемчеглери 2035 чылга чедир Сибирь федералдыг округтуң регионнарын хөгжүдер Стратегияже киргенин сагындыраал. Чурттар аразының чаа коридору чурттуң өске транспорт оруктарының чүъгүп эвэжээдип, а Тывага сайгарлыкчы чорукту оон-даа идепкейжидер.

Координация чөвүлелиниң хуралында «Красноярск - Курагино - Кызыл - Цаган-Толгой – Урумчи» демир-орук адырын тудар төлевилелди база тодаргай сайгарган. МАСС республиканың ол төлевилелин база деткээн.

«Россияның Президентизи Владимир Путинниң саналдааны Төп-Евразия транспорт коридорун хөгжүдер төлевилелдиң кедизи улуг» - деп, Владислав Ховалыг ТАСС-ка интервьюзунда демдеглээн. Ол ышкаш төлевилелче 1 трлн хире рубль хемчээлдиг инвестиция салдынарын, ооң боттанылгазынче 40 муң чаа ажылчын олуттар тургустунарын Тываның удуртукчузу дыңнаткан. «Чылда-ла ол шугумнап 40 млн тонна чүъктү аай-дедир аргыштырар» - деп чугаалаан.

Делегейниң Сибирь транспорт шуулганы ажылын үш хонук уламчылаар. Беш муң ажыг аалчылар, 50 хире организацияларның төлээлери ында киржип турар. Шуулганның киржикчилери транспорт-логистика инфраструктуразының, ужудукчу чокка ужар системаның база чурагай инновациязының, орук тудуг перспективаларының, транспортка айыыл чок чоруктуң, иштики суг транспортунуң, авиация үлетпүрүн хөгжүдериниң дээш, оон-даа өске айтырыгларны сайгарар.


Возврат к списку