Закрыть
Логин:
Пароль:
Забыли свой пароль?
Войти    

Тываның ийи техникуму "Профессионалитет" төлевилелче кирген болгаш, бүрүнү-биле эде дериттинер

Тываның ийи техникуму "Профессионалитет" төлевилелче кирген болгаш, бүрүнү-биле эде дериттинер 20.06.2024

Тываның хары угда ийи ортумак профессионал өөредилге черлери «Профессионалитет» федералдыг төлевилелге киржир. Ак-Довурактың даг база Тываның тудуг техникумнары 100-100 млн рубльдиң федералдыг дузаламчызын алырлар. Ол акша-хөреңги-биле өөредилге чериниң материал-техниктиг баазазы чаартынар – амгы үениң дериг-херекселдери болгаш техниказы-биле четчелеттинип, программалар республиканың күш-ажыл рыногунда даг-тывыш инженерлеринге база тудуг кадрларынга чогуур хереглелди дуглаар.

Эрткен чылын Балгазында Тываның агроүлетпүр техникуму «Профессионалитет» федералдыг төлевилелдиң бирги күүседикчизи, а Кызылда, Чадаанада база Сарыг-Септе көдээ ажыл-агый техникумнары кады боттандырыкчылары болганын сагындыраал.

Тываның Баштыңы Владислав Ховалыг грант алыкчыларының даңзызынче кирген чаа өөредилге черлериниң дугайында медээни бодунуң арынында дыңнаткан:

«Федералдыг деткимчени алырын, тудуг адыры шапкынчаанын өөренип көргеш, база Тастыгның литий чыдынынче улуг инвесторнуң киргени-биле, ол адырда өөредилге-бүдүрүлге кластерин регионга тургузарын үе негеп келген. Бистиң аныяктарывыс шынарлыг болгаш хереглелдиг мергежиллдерни чедип ап, а инвесторлар – бүдүрүлгениң вахта-биле ажылдаарын база кадрларның чедишпезин шиитпирлеп аптар» - деп, регионнуң удуртукчузу бижээн.

Бо өөредилге программазы-биле өөренген доозукчулар регионнуң башкарыкчы бүдүрүлгелеринге бедик мергежилдиг специалистер болуп ажылдаар. Техникумнарның өөредилге-бүдүрүлге төптери 2025 чылдың сентябрь 1-де ажылын эгелээр. Хүлээп алыр ажылчыннар саны бадылаттынган – 600 кижи. 2027 чылга чедир санаан сан-чурагайлардан алырга, «Профессионалитет» төлевилел даг кластериниң даг тывыш, транспорт болгаш тудуг адырынга бир муң беш чүс хире ортумак звенонуң специалистерин белеткеп бээр.


Возврат к списку