Тываның Баштыңы «Барьер» ведомстволар аразының операциязын эрттирерин сүмелээн

03.06.2024 Тывага «Барьер» оперативтиг-профилактика операциязы бүдүн июнь база июльда болуп эртер. Республиканың Баштыңы Владислав Ховалыг регион чазааның ээлчеглиг аппарат хуралында ону идип үндүрген. Оруктарга айыыл чок чорукту хандырар дээш, ылаңгыя эзирик чолаачыларның буруузу-биле орук-транспорт болуушкуннары көвүдээнинден хыналда-контрольду күштелдирер сорулгалыг ол болуп эртер.

Полицияның медеглээни болза, чүгле эрткен чеди хонукта, республикага 16 орук озал-ондаа болган. 17 кижи кемдеп-берттинген, оларның ийизи - чадаг кижилер. Орукка болган болуушкуннардан үш кижи амы-тынындан чарылган, он дөрт кижи аңгы-аңгы балыгланыышкыннарны болгаш кемдээшкиннерни алган.

Тываның күрүнениң автоинспекциязы эрткен неделяда руль артынга эзирик чораан 29 чолаачыны илереткен. Ол чолаачылар машина мунар эргелерин казыткан.

«Барьер» операциязының профилактиктиг хемчеглеринче орук полициязындан аңгыда, өске-даа ведомстволарның ажылдакчылары үнүп, бир дем-биле ажылдаарын Тываның Баштыңы негээн. Хоойлуга чөрүштүр арага садып-саарган барымдаалар илередир хүлээлгелиг ажыл-чорудулганың чамдык хевирлеринге чөпшээрел бээр регионалдыг албан, үндүрүг инспекциязы, каайлы чери, федералдыг айыыл чок албанының кызыгаар эргелели, приставтар албаны дээш, өске-даа черлер демнежип ажылдаары чугула деп Владислав Ховалыг сагындырган.