Тывага российжи-моол кады ажылдажылга перспективаларын сайгарып чугаалажыр

Тываның Баштыңы Владислав Ховалыг Красноярскиниң таможня база Моолдуң таможня органнарының төлээлери-биле Тываның Чазаанга ажыл-агыйжы ужуражылганы эрттирерин планнаан. Аңаа Красноярск таможнязының начальниги Василий Костомаров, Сибирьниң таможня эргелелиниң каайлы кады ажылдажылга килдизиниң начальниги Виктории Олчей киржир. Хандагайты эрттирилге пунктузунуң эде чаартылгазын, Кызылда агаар эрттирилге пунктузун хөгжүдерин, чурттар аразының каайлы кады ажылдажылга перспективаларын ужуражылга үезинде сайгарып көөр.
Майның 17-18-те, Кызылга, Красноярскиниң таможня база Моолдуң таможня органнарының төлээлери элээн каш ажыл-агыйжы ужуражылганы эрттирер. Хүн айтырыгларында – кызыгаар чоогунуң моон-даа соңгаар кады ажылдажылгазы, садыг-экономиктиг харылзаалар, «Боршоо» биле «Хандагайты» эрттирилге пунктуларын эде чаартып, хөй талалыг эрге-байдалче шилчидер, аңаа чоок чыдар девискээрлерни хөгжүдер айтырыгларны сайгарар.
Бөгүнде Тывада российжи-моол кызыгаарында үш пункт: Цаган-Толгой, Шара-Сур база Хандагайтыда ийи талалыг автомобиль эрттирилге оруу таварыштыр кол бараан аргыжылгазы чоруп турар.
Хандагайтының автомобиль эрттирилге пунктузунда 2022 чылда эгелээн ажылдар доосту бээрге, ооң аргыжылга  аргазы ийи катап улгадыр болгаш, кызыгаар эрттирилгези хөй талалыг статусту алган соонда, чүгле Россия биле Моолдуң эвес, а үшкү күрүнелерниң хамаатылары база аргыжып, бараан сөөртүлгези калбарар.
Ооң-биле чергелештир, Кызылдың аэропортунда агаар эрттирилге пунктузун эде чаартыр болгаш дериир ажылдар чоруп турар. Ону ажыдыптарга, республиканың найысылалы-биле Моолдуң төвү Улан-Батор болгаш Кыдат аразында делегейниң авиа-аргыжылгазы ажыттынар.