Тыва Республиканың Баштыңының Шагаа байырлалы-биле байыр чедириишкини

Эргим чаңгыс чер-чурттугларым!

Өгбелерниң ай санаашкыны-биле Чаа чыл   –    Шагаа байырлалы уткуштур Тыва Республиканың Чазааның база бодумнуң өмүнээмден байыр чедирип тур мен.

Үдеп турар Пар чылында шаптараазыннарга доктаавайн чонувустуң мерген угааны, тура-соруу болгаш кызымак күш-ажылының ачызында оларны ажып эрттивис. Чоннуң амыдыралынга таарымчалыг байдалдарны тургусчуп, шупту кады ажылдадывыс. Чедип алган чедиишкиннеривисти улам быжыглап, хөгжүдер бис.

Тоолай чылын кижи бүрүзүнге таарымчалыг, чымчак чыл деп айыткан. Үнүп орар чыл өг-бүлени база чырыткылыг чылыг одагны кончуг үнелээр болганда, чоок кижилериңерни, ада-иеңерни, улуг назылыг өгбелериңерни, ынак эштериңерни хүндүлеп, деткип, оларны өөртүп, сагыш-сеткилин үлежип, үеңерни кады эрттирип чоруңар.

Чаа чыл чонувустуң амыдырал-чуртталгазынга, ажыл-ижинге, өг-бүлезинге болгаш чоок кижилеринге улуг чедиишкиннерни, тиилелгелерни, быжыг кадыкшылды, эп-найыралды, ынакшылды, амыр-тайбыңны сөңнээр болзун!

Ак Шагаада эки чүве элбек болзун, чаагай күзел бүдүп, сүлде, хей-аът бедик турзун! Курай! Курай! Шагаа-биле!