Орус дыл талазы-биле күрүне инспектору

Республиканың башкылар ниитилелиниң сүмелээни-биле орус дыл талазы-биле күрүне инспекторунга Тываның Баштыңының томуйлааны орус дыл болгаш литература башкызы Татьяна Шарыпова өөредилге болгаш эртем сайыдының оралакчызы албан-дужаалга ажылын эгелээр. Ол дугайында доктаалды ТР-ниң Чазааның хуралынга чоокку үеде хүлээп алыр. Ынчангаш Тыва Республика — орус дыл талазы-биле күрүне инспектору албан-дужаалды киирген Россияда баштайгы девискээр.

«Орус дылды өөренип болгаш өөредип турар талазы-биле Тывада байдалды сайгарып көргеш, боттарыңарның саналдарыңарны киирер силер – деп, Шолбан Кара-оол Татьяна Шарыповага чугаалаан. – Ол сайгарылгага даянып, орус дылды өөренирин, башкылаарын экижидер, орус дылдыг башкыларны көдээже чорудар, оларга чиигелделерни бээр, акша-хөреңги болгаш материалдыг дузаны чедирер дээн ышкаш хемчеглерни ап эгелээр бис».

Республикага орус дылдың күрүне инспекторунуң ажылдап эгелээни-биле эң ылаңгыя көдээ школаларга орус дылды башкылаарының материал-техниктиг байдалы экижиир боор деп, арга-дуржулгалыг орус дыл башкылары санап турар.