Тывада оперативтиг штаб чурттакчы чонга садар хөмүрде кызыгаарлаашкынны ап кааптарын Тываның даг-руда компаниязынга сүмелээн

28.10.2022 Тываның Баштыңы Владислав Ховалыг РФ-тиң Президентизиниң регионнарда айыыл чок чоруктуң чугула деңнелин хандырар чарлыын күүседир оперативтиг штабтың ээлчеглиг хуралын эрттирген.
Штабтың кежигүннери хөмүр тывар компанияга чурттакчы чонга база одаар чүүл складтарынга хөмүрнү садарының чурумун эде көөрүн сүмелээн. Оперштабтың шиитпириниң хоолгазын регионнарның айыыл чок чоруун хандырар талазы-биле ажылды дүүштүрүп турар шупту черлеринче дамчыткан.
Оперативтиг штабты удуртуп турар Владислав Ховалыг “ТДРК” КХН-ге чүнү сүмелээнин дыңнаткан:
«Бирээде. Чурттакчы чонга садар хөмүрнүң хемчээлин (5 тоннадан көвүдевес) ап кааптар, база кижилерниң амы-хууда медээлери кирген бажың документилерин көргүзер негелдени соксадыр.
Ийиде. ТДРК чурттакчы чонга хөмүрнү садар кылдыр одаар чүүл складтары-биле чагыкчының (агент) керээлерин чарар».
Владислав Ховалыг оперативтиг штабтың шиитпириниң хоолгазын РФ-тиң Президент Администрациязынче, РФ-тиң Чазаанче (вице-премьер А.В. Новакче), регионнарның айыыл чок чоруун хандырар талазы-биле ажылды дүүштүрген күрүне комиссиязының удуртукчузу, Москваның мэри С. Собянинче чорудар даалганы берген.
Тываның Одалга болгаш энергетика яамызы биле муниципалдыг тургузуглар чагыргалары оперштабтың сүмелериниң күүселдезин холга алыр.