Тывада өрт айыылының сезону хагдынган

20.10.2021 Тываның Чазаа октябрьның 18-тен арга-арыг фондузунуң черлеринде өрт айыылының сезону соксаан дугайында шиитпирни хүлээп алган. Арга-арыг өрттериниң саны эвээжээни-биле ындыг шиитпир үнген. Ооң-биле чергелештир, республика чурттакчыларның арга-арыгже баарын кызыгаарлаан хемчегни база күш чок болдурган. Ындыг болзажок, Тываның Бойдус яамызы арга-арыгга чорааш, өрт айыылының дүрүмнерин сагыырын хамаатыларга сагындырган.
Тывада өрт айыылының сезонун апрель 5-тен эгелеп чарлаанын сагындыраал. Ол үеден бээр республика девискээринге 1071,6 га ниити шөлдүг (2020 чылда – 18059,57 га) 33 арга-арыг өрттери (2020 г – 63) бүрүткеттинген. Оларның ийизи онза камгалалдыг девискээрлерге болган. “Азас” күрүнениң бойдус заповеднигинге өөскээн өрт 6,5 га арга-арыгны узуткаан (2020 ч. – 125,5 га).
2021 чылда хыпкан өрттерниң чылдагааннары – кижилерде база чаңныктарда деп, специалистер түңнээн. Ол дээрге хыпкан өрттерниң 80 хуузу болган. Арга-арыг камгалалының ажылдакчылары сезон дургузунда айыыл чок чорук дүрүмнерин хажыткан кижилерге онааштыр 67 протоколду долдурган. Буруулуг кижилерни административтиг харыысалгага онааган.
Арга-арыг камгалалының албаны арга-арыгга өрт үнүп болур хөделиишкиннерни бодурбас дээш, хамаатылар-биле ажылдап турар. Бир эвес арга-арыгга өрт үнгенин көрүп кагзыңарза, арга-арыг камгалалының 8-800-100-94-00 телефонунче азы Регионнуң диспетчер албанының 8 (394-22) 5-04-86 дугаарынче, база ол ышкаш дүрген кыйгыртыышкынның  112 дугаарынче дыңнадырын республиканың чурттакчыларынга сагындырып тур.