«Чылдың студентизи» Россияның национал премиязы дээш түңнел мөөрейде Тывадан студентилер кирген

19.10.2021 «Чылдың студентизи» Россияның национал премиязы дээш түңнел мөөрейде Тывадан студентилер кирген. Ноябрь 6-11 хүннеринде Томск хоорайга, профессионал өөредилге черлериниң аразынга, “Чылдың студентизи” Россияның национал премиязы дээш, түңнел мөөрейлер болуп эртер. Чурттуң 69 регионундан шилиттинген 400 тулган студентилер санында Тывадан Сылдысмаа Хомушку, Мария Толмачева база Дара Куулар база кирген. Сылдысмаа Орлановна Хомушку – Чадаана хоорайда Технология техникумунуң 3-кү курсчузу “Чылдың хөй-ниитичизи” номинацияга киржир. Мария Владимировна Толмачева – Тываның политехниктиг техникумунуң 3-кү курсчузу – “Чылдың старостазы” номинацияда. Дара Романовна Куулар – А.Б. Чыргал-оол аттыг Кызылдың уран чүүл колледжизиниң 2-ги курстуң студентизи – “Чылдың чогаадыкчы кижизи» номинацияга мөөрейлежир. Бо чоокку беш хонукта сургуулдар чааскаан азы хөйнүң киржилгези-биле мөөрей шылгалдаларынга киржир: бодун таныштырып, тускай тестини, ажык кичээл шагын эрттирип, дебаттарга киржип, тускай төлевилелдерин болгаш ойнаар оюннарын шииткелче киирер.