Владимир Путин-биле ужуражылгага 2021 чылда «Россияның чылдың башкызы» бүгү-российжи мөөрейниң финализи, Тывадан Екатерина Китайкина киришкен

08.10.2021 Күрүне баштыңы 2021 чылда «Россияның чылдың башкызы» бүгү-российжи мөөрейниң тиилекчилери-биле видео-конференцхарылзаазы дамчыштыр ужурашкан.
Найысылал Кызыл хоорайда, чамдык эртемнерни хандыр өөредир 11 дугаар школаның эге класстар башкызы Екатерина Анатольевна Китайкина Тываны ол мөөрейге төлээлеп киришкенин сагындыраал. Сентябрьның 25-те Ростовда-Дон хоорайга, мөөрейниң федералдыг чадазынга российжи регионнарны 85 башкы төлээлээн. Мөөрейниң түңнел кезээнде эң хөй санны алган 15 киржикчи лауреаттар болганын чарлаан. Оларның бежи – призёрлар.
Москвага эрткен шиитпирлиг шылгалдага – “Чылдың башкызынга айтырыг” парлалга-конференциязынга Тюменьниң 16 дугаар гимназиязының физика башкызы Екатерина Костылева тиилээн. Бистиң региондан кордакчы башкы Екатерина Китайкина мөөрейниң төнчү кезээнче кирген.
Россияның Президентизи Владимир Путин Башкылар хүнүнде, видео-концеренцхарылзаалыг ужуражылга үезинде, профессионал байырлалы-биле мөөрейниң лауреат болгаш призер башкыларынга байырын чедирген.
"Бүгү чурт «Чылдың башкызы» мөөрейниң шупту киржикчилерин – чайынналчак специалистер, чырык, солун кижилер деп билген турар ужурлуг. Башкы кижиниң алдар адын, башкылаашкын ажылын бедик деңнелче көдүрер деп, боттарыңар база кезээде чугаалап чоруур силер. Ынчангаш келир чылдан эгелеп, башкы мергежилдиң шылгараңгай төлээлери хөйге билдингир боор кылдыр, конкурстуң хемчеглерин калбаа-биле чырыдып, чурттуң педагогика ниитилежилгезиниң деңнелин көдүрер шиитпир хүлээп алдынган. Башкының профессионал мергежилинге езулуг үнелел – ооң өөреникчилериниң чедиишкиннери, амыдыралда боттарын тып алгаш, бүзүрелдиг базып, чоок улузунга, ниитилелге, төрээн черинге дузалажып, ажыктыг чүүлдү кылып чоруур кижилерни кижизиткенинде. Силерге ындыг профессионал чедиишкиннерни күзедим. Ындыг болурунга, бүзүрээр мен» – деп, президент чугаалаан.
Ужуражылга үезинде, Владимир Путин башкы мергежилдиң бедик ниитилел ужур-дузалыын демдеглеп, 2023 чылды - российжи педагогиканың үндезилекчилериниң бирээзи Константин Дмитриевич Ушинскийниң 200 харлаанынга база башкылар болгаш дагдыныкчыларга тураскаадып, Россияда Башкының чылы кылдыр чарлаан. Президент башкылаашкын мергежилиниң кол национал мөөрейиниң лауреаттарын база финалистерин башкы чылының белеткел ажылдарынга киржип, Россия Федерациязының Чырыдыышкын яамызында коллегалары-биле боттарының идеяларын үлежирин дилээн.