Сибирь федералдыг университет келир үеде туттунар Тываның Даг техникумунга херек өөредилге программаларын база башкыларны белеткээр

01.10.2021 Сентябрь 28-те Тываның Чазаанга, даг техникумун Кызылга тудар айтырыгны чугаалашкан хурал болуп эрткен. Тываның Чазаа биле “Голевтиң ДРК” КХН аразында, Кызылга Даг техникумун тудар дугайында дургужулга чардынганын сагындыраал. 2022 чылда эгелээр объект тудуун күрүне-хуу эштежилгези-биле кылыр.
Тыва Республика Чазааның Даргазының бирги оралакчызының хүлээлгезин күүседип турар Александр Брокерттиң удуртулгазы-биле эрткен Даг техникумун тудар төлевилел боттаныышкынының дугайында хуралга, Тываның Өөредилге болгаш эртем яамызының, ТР-ниң Аныяктар херектериниң талазы-биле агентилелдиң, Тываның күрүне университединиң, “Енисей Сибири” корпорацияның, регионда даг-тывыш бүдүрүлгелериниң төлээлери, ол ышкаш чалаткан аалчылар – Сибирь федералдыг университеттиң ректору Максим Румянцев база өөредилге талазы-биле проректору Денис Гуц киришкен.
Республикада үлетпүр хөгжүлдезиниң бир угланыышкынынга – казымал байлактар тывыжын шиңгээдири хамааржыр. Ынчангаш бөгүн республикада улуг даг-тывыш компанияларынга ажылдаар тус черниң кадрларын белеткээри - Тываның Чазаанга чугула айтырыг. Тываның школа доозукчуларынга амгы үениң үлептүр адырынга ажылдаар арганы бээри-биле, бедик технологиялыг бүдүрүлгелерге херек эртем-билиглерге өөредири дугуржулгада көрдүнген.
Тыва-биле кады  дугуржулгалыг Сибирь федералдыг университет даг техникумунга алызында херек башкы кадрларны белеткеп база өөредилге программазын ажылдап кылыр. Техникум доозукчулары СФУ-га өөредилгезин уламчылап база болур. Өөредилге чериниң төлээлери Тываның күрүне университединиң “Даг херээ” кафедразынга чедип, келир үениң дагжыларының бо хүнде өөренип турар программалары база билиглери-биле танышкан.
Голевтиң даг-руда компаниязы республикада канчаар-даа аажок улуг хемчээлдиг «Ак-Сугнуң чес-порфир чыдынында чес, молибден база өске-даа бүдүмелдерни шинчилеп база казып-тывары» төлевилелди боттандырып турар. Чылда 24 млн тонна руда база ортумаа-биле 500 тонна чес-молибден холуксаазын казып-тывар күчүлүг Ак-Суг даг-руда бүдүрүлгезин компания Тожу кожуунга тудар. Ону 2024 чылда ажыглалга киирер. Бүдүрүлгеге ажылдаар ажылдакчыларны чыырда, бирги ээлчегде Тываның чурттакчыларындан специалистерни алыр.