Тываның Соңгулда комиссиязы: чаңгыс аай бадылаашкын хүнүнүң төнчү түңнелдерин сентябрь 27-де үндүрер

21.09.2021 Чаңгыс аай бадылаашкын хүнүнүң баштайгы түңнелдерин дыңнаткан бөгүнгү брифингиде, Тыва Республиканың Соңгулда комиссиязының даргазы Олег Фортуна ону дыңнаткан. Республикага эрткен соңгулдаларда бадылаашкынның көргүзүү чуртта эң бедик бооп, 83,26 хуу четкен. Республиканың соңгулда комиссиязынче чер-черлерде девискээр соңгулда комиссияларындан протоколдар ам-даа кээп турарын Фортуна чугаалаан. Бөгүн регионнуң соңгулда комиссиязы  санаашкын соонда, үш хүн үргүлчүлээн бадылаашкынның төнчү түңнелдерин үндүрген комиссия хуралын эрттирер. Баштайгы сан-чурагайлардан алырга, «Чаңгыс демниг Россия» партия Россия Федерациязының Федералдыг Хуралының Күрүне Думазының сески чыыжының депутадынче соңгулдаларның федералдыг соңгулда округунда бадылаашкынында шупту үннерниң 85, 34 хуузун алган. Тываның №32 чаңгыс мандаттыг соңгулда округунче «Чаңгыс демниг Россия» партиядан идип үндүрген кандидат Айдын Сарыглар шупту соңгукчуларның эң хөй үнүн - 74,43 хуузун алган. Девискээр соңгулда комиссияларындан келген протоколдарны аайлаанының түңнелинде, республиканың дээди албан-дужаалынче хуусаа бертиниң соңгулдаларында кандидат Владислав Ховалыг дээш эң хөй кижи бадылааны, соңгукчуларның 86, 81 хуу үнүн алганы тодараттынган. Тываның Соңгулда комиссиязынче 14 хомудал бижик кирген. Оларны сайгарып көргеш, билдириишкин ээлеринге харыыларны берген деп, Фортуна дыңнаткан. Соңгулда комиссиязының удуртукчузу бо сан-чурагайлар баштайгы түңнелдер-дир айыткан. Келир понедельникте, сентябрь 27-де, чаңгыс аай бадылаашкын хүнүнүң төнчү көргүзүүн чарлаар.