«Россияның 100 тулган барааннары» мөөрейде Тываның бараан бүдүрүкчүлери киржип турар

14.09.2021 «Биче болгаш ортумак сайгарлыкчы чорукту база сайгарлыкчы эгелээшкиннерни деткиири» национал төлевилелди боттандырар дээш, республиканың сайгарлыкчы чорук деткиир фондузунуң деткимчези-биле, Тывадан дөрт сайгарлыкчы-бүдүрүлге «Россияның 100 тулган барааннары» конкурста киржип турар.
Чурттуң тулган барааннарын илереткен конкурс чылдың-на, Росияның шупту регионнарында эрттип турар. «Шынар айтырыгларының академиязы» регионнар аразының хөй-ниити организациязы, Техниктиг өйлээшкин база метрология талазы-биле федералдыг агентилел (Росстандарт) база «Росшынар» коммерцияга хамаарышпас автономнуг организация - конкурстуң организаторлары.
Красноярск край, Хакас Республика база Тыва Республикада стандартизация, метрология база шенелделерниң күрүнениң регион төвүнүң баазазынга бистиң республика талазы-биле конкурстуң регион чадазы 2021 чылдың июльда Краснояскиге болуп эрткен.
Шынар хынаан комиссияның түңнелдери-биле, Тывадан дөрт киржикчи федералдыг чадаже кирген:
- Таңды кожууннуң “Бай-Хаак” КХН-ниң бүдүрүп турары “Персик амданныг соок шай” суксуну;
- Кызыл хоорайда “Мөңгүн” КХН-ниң “Тываның алдыны” деп пөш тооруктуг, сүтсүг шоколады;
- Кызыл хоорайда Хертек В.В хуу бүдүрүлгезиниң “Боорзак” деп быжырган далганы;
- Таңды кожуундан тараачын-арат ажыл-агыйының баштыңы Оюн Ч. Х.-Д-ниң хуу бүдүрүлгезиниң арыглаан ижер сүдү.
Конкурстуң федералдыг чадазының лауреаттары болгаш дипломантылары болур регион чадазының тиилекчилерин бо чылдың декабрьда шаңнаар.
Ада-чурт барааннарының шынарын экижидип, чижилгелиг чоруун деткиир сорулга-биле конкурс эрткен. Ол хемчегге киржилге эрге-чагырганың база бизнестиң социал-экономиктиг кады эштежилгезинге эки салдарлыг. Конкурстуң тиилекчилери хөгжүп-сайзыраарының чаа чадазынче үнер эптиг арганы ап, бүдүрүкчүлерге эң кол шаңнал – хереглекчилерниң бүзүрелин чаалап алырынга идигни бээр.