Владислав Ховалыг Россияның ОБЯ-зының баштыңының чок болганы-биле кажыыдалын илереткен

09.09.2021 Тываның Баштыңы албан-хүлээлгени күүседип турар Владислав Ховалыг Россияның Онза байдалдар яамызының баштыңы Евгений Зиничевтиң мөчээни-биле. ооң чоок кижилеинге, кады ажылдап чораан эш-өөрүнге кажыыдалын илереткен. Ол чүгле 55 харлыг. Ооң амыдырал-чуртталгазы чурттуң айыыл чок чоруун хандырар база кижилерни камгалаар ажылдар-биле холбашкан.
“Россияның онза байдалдар яамызының баштыңы Евгений Николаевич Зиничев чок болган деп, аар медээни бүгү российжилерге дыңнаткан. Ол алдар-аттыг, хүндүткелдиг кижи чаа-ла 55 харлаан. Өөредилгелер үезинде өске кижиниң амы-тынын камгалап тура, Евгений Николаевич өлген. Бодунуң амыдыралын ол Төрээн чуртунуң айыыл чок чоруунга, улустарның амы-тынын камгалаар херекке бараалгаткан. Ооң төрээн болгаш чоок кижилеринге, кады ажылдап чораан эштери – российжи камгалакчыларга ханы кажыыдалым илередип олур мен” – деп, Тываның Баштыңының албан-хүлээлгелерин түр үеде күүседип турар Владислав Ховалыг соцчеткилерде бодунуң арынында бижээн.
 Евгений Зиничев Норильск хоорайга албан аайы-биле сургакчылаашкын үезинде, онза байдалдардан арктиктиг зонаны камгалаар талазы-биле ведомстволар аразының өөредилгези чоруп турда, айыыл-халапка таварышкан кижини камгалап тургаш чок болганын, РФ-тиң Онза байдалдар яамызының парлалга албаны дыңнаткан.