Тывада хуу сайгарлыкчыларны деткиири-биле республика бюджединден 50 ажыг миллион рубльди аңгылаан

10.09.2021 Биче болгаш ортумак бизнестиң төлээлери бизнезин шуудадып, дериг-херексел саткан чарыгдалдарынга субсидия алыр чагыгны киирип болур.
Коронавируска удур чарлаан кызыгаарлаашкын үезинде когараан биче болгаш ортумак сайгарлыкчы чорук төлээлеринге ниитизи-биле 30 млн рубльдиң субсидиязы – республика деткимчезин бээр. Ону сайгарлыкчы чорук субъектилеринде ажылчыннарны хевээр арттырып, албан езузу-биле ажылдап турар бир кижиниң күш-ажылын төлээринге 12792 рубльди – бир МРОТ хемчээлдиг деткимчени бээри көрдүнген. Сайгарлыкчылар субсидияны ажылчыннарының күш-ажыл төлевиринче, камгаладылга дадывырлары, үндүрүглер төлээринче база оран-сава хөлезилээринче ажыглаар.
10 млн рубльди барааннар бүдүрүлгезин (ажылды, ачы-дузаны) эгелеп азы сайзырадып, азы чаартылга кылыр сорулга-биле дериг-херекселдер саткан чарыгдалдарының кезик-чамдыызын эгиткен субсидияже үлештирер. 2021 чылдың август 9-та, биче болгаш ортумак сайгарлыкчы чорук субъектилериниң дериг-херекселдер садып алырынга саң-хөө деткимчезин көргүзер сорулгалыг конкурс чарлаттынганын сагындыраал. Конкурстуң негелдези-биле, сайгарлыкчылар бүдүрүлгени тургузуп, сайзырадып, эде чаартыр дээш, садып алган дериг-херекселдер өртээниниң 50 хуузунга, хөй дизе 5 млн рубль чедир түңге субсидияны ап болур. 2020 чылдың январь 1-ден бээр бүдүрген чаа дериг херекселдерди садып алганы дээш, субсидия көрдүнген.
Туризм бизнезинде сайгарлыкчыларның лизинг керээзи-биле садып алганы дериг-херекселдериниң, көдээ ажыл-агый техниказының, мототранспорт аймааның бирги дадывырынга (авансызынга) субсидия кылдыр оон аңгы база 10 млн рубльди тускайлаан. Субсидияның хемчээли лизинг керээзин чарып турда айыткан баштайгы дадывырның (авансының) 50 хуузундан ашпас болур, ынчалза-даа саткан чүүлүнүң өртээнден 25 хуудан көвүдевес, база бир кижиге 3 млн-дан ашпас.
Бизнес-инкубатор, ТР-ниң Сайгарлыкчы чорук деткиир фонд база Тыва Республиканың Күрүне болгаш муниципалдыг ачы-дуза көргүзер хөй талалыг ажыл-чорудулгалыг төвү субсидиялар бээринче чагыгларны ажыл хүннеринде, 9.00 шактан 18.00 шакка чедир дараазында адресте хүлээп турар: Кызыл хоорай, Эки турачылар кудумчузу, б. 18, 2-ги каът, бир эвес айтырыглар бар болза, изиг шугумнуң бо дугаарларынче долгаар: 8-800-350-62-01, азы 8(39422)3-60-18, 8(39422)2-17-67, ажыл хүннеринде 9.00-18.00 шакта.
Тываның Чазааның республика сайзыралынче дээш алганы 1,5 млрд рубльдиң кезиин сайгарлыкчы чорук деткииринче угландырар.