Владислав Ховалыг Билиглер хүнү-биле өөреникчилерге, сургуулдарга, башкыларга база ада-иелерге байырны чедирген

01.09.2021 Бөгүн Тываның школаларынга 11-ги база 1-ги класстың өөреникчилеринге байырлыг чыскаалдар эрткен. Нарын эпидемиологтуг байдал ужун, доозукчулар болгаш биргиклассчылар ада-иелери чокка чыскаалган. Баш бурунгаар санаашкыннардан көөрге, чаа өөредилге чылында, республиканың школаларында 73828 өөреникчи парталарга олуруптар. А бирги классче 7184 чаштар кирген.
Тываның Баштыңының албан-хүлээлгезин түр үеде  күүседип турар Владислав Ховалыг чаа өөредилге чылының эгелээни-биле, өөредилге черлериниң сургуулдарынга база өөреникчилеринге, башкыларга болгаш ада-иелерге байырны чедирген.
- Хүндүлүг школачылар, студентилер, башкылар база ада-иелер! Билиглер хүнүн таварыштыр база чаа өөредилге чылының эгелээни-биле мээң эң-не чылыг-чымчак күзээшкиннеримни хүлээп ап көрүңер!
Сентябрь 1 – бодунуу-биле онзагай хүн. Ол чайгы дыштанылганың, шөлээниң соонда, чаа күш-ажылчы үени илередип турар, а бирги классчылар чуртталгазының чаа базымынче кирерлер. Бо хүнде, эш-өөрүвүс, башкыларывыс-биле өөрүшкү-маңнайлыг ужуражып, идегле-биле чаа өөредилге чылынче көөр бис.
Бөгүн Тывада шупту школаларның эжиктери уругларга ажык. Школаларже 73 муң ажыг уруг өөренип кирген, оларның иштинде 7184 бирги классчы бар. Профессионал өөредилге черлери чүс-чүс студентилеринге бирги кичээлди эрттирер.
Кижи кандыг-даа бедиктерни чедип алза, ооң оруу дөмей-ле школадан эгелээр. А амыдыралда, эртемнер делегейинче бир дугаар дагдыныкчылары-даа, үдекчилери-даа башкылар болур.
Эргим школачылар болгаш студентилер, бүгү чүве шупту силерниң боттарыңардан хамааржыр. Чаа өөредилге чылы силерниң алыс сорулгаларыңарже базымыңарны чоокшуладыптар дээрзинге бүзүреп тур мен. Өөрениңер, чедиишкиннериңерге доктаавайн, билиглерниң бедиинче база чаа-чаа ажыдыышкыннарже чүткүңер!