Тывада «Школаже белеткениринге дузалаш!» чылдың ачы-дуза акциязы эгелээн

26.08.2021 Республиканың Күш-ажыл болгаш социал политика яамызы “Школаже белеткениринге дузалаш!” деп республиканың 11-ги ачы-дуза акциязы эгелээнин чарлап, ол бо чылдың сентябрь 20-ге чедир уламчылаарын дыңнаткан. Эрткен чылын акция эвээш хандырылгалыг, хөй ажы-төлдүг, долу эвес база кадыкшылы кошкак уругларлыг өг-бүлелерниң 5032 уруг-дарыын школаже белеткээринге дузалаан.
Республиканың социал деткимче төвүнүң курлавыр килдизи регионда адрестиг социал дузага хереглелдиг 1702 өг-бүлени тодараткан. Өг-бүлелерде 2983 ажы-төл бар. Оларның 2753-ү школачылар болза, 230-и биргиклассчылар.
Материалдыг берге байдалдыг өг-бүлелерде школачы санынга-ла 10 муң рубль хемчээлдиг чаңгыс катап бээр төлевир 1228 уруг-дарыгны школага бүрүн белеткээринге идиглиг болган. Амгы үеде 321 өөреникчиниң өөренир херекселдеринге база идик-хевинге дээш социал деткимче херек.
Уругларны школаже белеткээринге дузалажыр дизе, республиканың кожууннарында Өг-бүле база уругларга социал деткимче төптеринче баарын дыңнаттывыс:
Кызыл хоорай, Бай-Хаакская кудумчузу, 6;
Ак-Довурак хоорай, Ленин кудумчузу, 16;
Каа-Хем суур, Щорс кудумчузу, 10;
Сарыг-Сеп суур, Медицинский переулогу, 2;
Туран хоорай, Комсомольская кудумчузу, 86;
Чаа-Хөл суур, Сундуй Андрей кудумчузу, 2;
Мугур-Аксы суур, Кошкар-оол кудумчузу, 33;
Бай-Хаак суур, Пушкин кудумчузу, 20 «а»;
Суг-Аксы суур, Набережная кудумчузу, 55 «а»;
Эрзин суур, Салчак Тока кудумчузу, 37;
Хову-Аксы суур, Мир проспектизи, 31 «а»;
Чадаана хоорай, Шахтерская кудумчузу, 1;
Кунгуртуг суур, Комсомольская кудумчузу, 1;
Тоора-Хем суур, Октябрьская кудумчузу, 11;
Кызыл-Мажалык суур, Чургуй-оол кудумчузу, 60;
Тээли суур, Серен Дондуп кудумчузу, 11;
Хандагайты суур, Вокзальная кудумчузу, 1;
Шагаан-Арыг хоорай, Тудугжулар кудумчузу, 10.
Ачы-дуза акциязының киржикчилеринден алыр канцеляр барааннары, бижиттинер херекселдер, кыдырааштар, чуруттунар чүүлдер, уран чогаадылга чүүлдери чаа болурун дыңнадып тур. А портфельдер, школа хептери, өөредилге база уран чогаал номнары эки эдилеттинген болуру күзенчиг.
Ачы-дузага берген шупту чүүлдерни социал деткимче учедунда өг-бүлелерге үлештирер.
Тываның буянныг чурттакчылары эрткен чылын 2 661 169 рубль түңге ачы-дузаны көргүскен.
Сентябрь төнчүзүнде бо акцияның түңнелин үндүрер. Ооң дугайында медээ Тыва Республиканың Күш-ажыл болгаш социал политика яамызының сайтызынга үнер.