Тывада чамдык кызыгаарлаашкыннарны сулараткан: хөй-ниити чемненилге черлери база Азия төвү комплекс ажыттынган

24.08.2021 Нарын эпидемиологтуг байдал уржуундан киирген чамдык кызыгаарлыг хемчеглерни ап кааптар дээн күрүнениң кол санитар эмчизиниң саналы-биле, бөгүн “2021 чылдың июль 6-да №223 Чарлыынче өскертилгелер киирер дугайында” Тыва Республиканың Баштыңының Чарлыында атты салган.
Өскертилгелер библиотекалар, музейлер, скверлер, парктар, хөлдерде болгаш хөл чоогу черлерде дыштанылга бажыңнары база баазалар, хөй-ниитиниң чемнелеге черлериниң ажылдаар чурумунга хамааржыр. Тываның Чазааның сайтызында “Албан езунуң документилери” кезектен азы эрге-хоойлу медээлериниң http://pravo.gov.ru/ албан езунуң интернет-порталындан документиниң долу сөзүглели-биле таныжып болур.
Республиканың кол санитар эмчизи Людмила Салчак чамдык кызыгаарлаашкыннарны кошкадып болурунуң дугайында саналды дүүн аппарат хуралында киирген. Чамдык кызыгаарлаашкыннарны суларатканы, белен чоруктуң чурумун ап кааптары эвес-тир, ынчангаш канчаар алдынарының ооң мурнунда киирген чурумну хамаатыларның болгаш организацияларның сагып турарынга доктаамал контрольду чорудары хевээр артар деп, ол сагындырган. Хөй кижилер киришкен массалыг хемчеглер эрттирери ам-даа хоруглуг. Бир дугаарында ол өг-бүле байырлалдарынга хамааржыр.
Тыва Республиканың Чазааның даргазының оралакчызы - Тыва Республиканың экономика сайыдының албан-хүлээлгезин күүседип турар Айдыс Сат Баштыңның чарлыында киирген өскертилгелерниң утказын тайылбырлаан:
- ТР-ниң кол санитар эмчизи кызыгаарлаашкынны чоорту суларадыр дугайында саналды дүүн киирген. Библиотекаларны, музейлерни, парктарны, скверлерни катап ажылдадырын, ол ышкаш хөлдер, сугларже барып болурун чөпшээрээн өскертилгелерни ажылдап кылгаш, ТР-ниң Баштыңының июль 6-да № 223 Чарлыынче киирген бис. Ынчангаш «Азия төвү» архитектурлуг комплекске дыштанып, «Алдын-Булак» этнокультура комплекизинге барып болурун чөпшээрээн. Ол ышкаш дыштанылга бажыңнары база баазалар дыштаныкчыларын 30 хуу чедир хүлээп болур. Хөй-ниитиниң чемнелге черлери залда олуттарын 25 хуу чедир долдуруп алгаш, эртенгиниң 6.00 шактан 22.00 шакка чедир ажылдап болурун база айыткан. А 22.00 шактан 6.00 шакка чедир чемнерни чүгле үндүр садар. Хөй-ниитиниң шупту чемненилге черлеринге массалыг хемчеглер эрттирерин бүрүнү-биле хораан чурум хевээр арткан.
Ведомстволарның каттышкан бөлүктери ооң мурнунда киирген болгаш бо хүнден эгелеп сулараткан хемчеглер кайы хире күүсеттинип турарын хыналдага алыр.