Тываның школаларынче эрткен чылга деңнээрге 4228 кижи хөйге бижиткен

20.08.2021 Тыва Республиканың Өөредилге болгаш эртем яамызының дыңнатканы болза, чаа өөредилге чылында өөредилге организацияларынче хүлээп алыышкын дүүн доозулган. Регионда шупту 377 өөредилге объектилери бар. 2021/22 өөредилге чылында 73 828 өөреникчи, азы 2020 чылга деңнээрге 4228 кижи хөйге өөренип кирери баш бурунгаар билдинген. Бирги классче 7 184 чаштар бижиткен. Кызылдың хоорай чоогунда 825 олуттуг чаа школаның ажыттынары, найысылал школаларында “чүъктү” эвээжедир ужурлуг.
521 өөредилге объектилериниң 79-зу бо хүнде белениниң паспортун албаан, оларның 24-ү Культура яамызынга, 53-ү муниципалдыг өөредилге организациялары база бирээзи Тываның Өөредилге яамызынга хамааржыр ведомство албан чери болур. Саадаашкынның чылдааганы билдингир, ам ону чаа өөредилге чылынга чедир эдер хемчеглер чоруттунуп турар.
Август 17-ниң хүнү-биле алырга, школаларда 260 башкы ажылдар хостуг. Кызыл хоорайда - 59, Бии-Хемде - 39, Чөөн-Хемчикте – 29, Улуг-Хемде – 26 база Кызыл кожуунда – 20 хостуг олуттар бар. Бо хүнде республиканың өөредилге черлеринде 17 559 кижи ажылдап турар.
Школаларга, уруглар садтарынга коронавирус инфекциязынга удур профилактика хемчеглерин чорудар дээш, ырактан хемчээр 1744 термометрни, холдар арыглаар 4400 дозаторну, 5200 бактерицидтиг лампаны, 15705 камгалал маскаларны база 12779 эжеш хол-хаптарын белеткээн.
Август 17-ге чедир, 17 559 өөредилге ажылдакчыларының 12677-зи, азы 72,03 хуузу коронавируска удур долу тарылганы алган.
2021 чылда өөредилге черлерин септеп-селииринге 175,6 млн рубль көрдүнген. Бо хүнде республиканың шупту өөредилге черлеринде агар септелге кылдынган. Аварийлиг байдалда ийи школа бар – Кызылдың № 14 школазы биле Таңды кожууннуң Балгазын школазы.
Кызыл хоорайның солагай талакы дачалар районунда 825 олуттуг чаа школа бо өөредилге чылында ажылдап эгелээр. Школаже 1514 өөреникчи бижиткен, 131 кижини ажылда хүлээп алган.
2021 чылда эге класстарның 30630 өөреникчилерин изиг чем-биле чемгереринге 382,204 млн рубльди тускайлаан. Школаларның чемненилге черлерин база буфеттерни бүрүн дерип, хандырган. Эртенги, дүштеки база кежээки чемненилгениң регион рационунга даянгаш, 7-11 харлыг школачыларның кижи бүрүзүн 3 катап чаңгыс аайлаан чемнер-биле чемгерер.
Республиканың школалары өөредилге номнары база пособиелер-биле 84 хуу хандырттынган. Школаларның библиотека фондуларында 984890 санныг номнар база пособилер бар. Ындыг болзажок, 245 млн рубль ниити акшага ам-даа 544454 санныг өөредилге материалдарын садар.
Бо өөредилге чылында ниити билиг школаларында бар электроннуг өөредилге пособиелерин база номнарны ажыглаар.
Шупту школалар Интернет четкизинде коштунган. Ындыг-даа болза, Үжеп-Аксы школазында, Кызыл-Хая суурнуң Катазы деп черде эге школада, ол ышкаш Хүт, Кунгуртуг, Качык база Кара-Хөл суурларда интернеттиң дүргени оожум.