Тывада тожу тываларының төпчүткен каттыжыышкыны тургустунган

12.08.2021 Тере-Хөл, Мөңгүн-Тайга база Тожу кожууннарында тожу тываларының общиналар удуртукчулары 2021 чылдың май 21-де тургузукчу хуралды эрттиргеш, Тываның девискээринде Сибирьниң биче буурай үндезин чоннары – тожу тываларын мөөңнээн каттыжыышкынны тургузар дугайында шиитпир хүлээп алдынган. Ассоциация регионда биче буурай чоннарның шагдан бээр чурттап турар черлерин база чаңчылчаан амыдыралын камгалаар эргелерни хандырар дээш ажылдаар.
Чаа ассоциацияның удуртукчузу Доржа Никитин, тожу тываларының "Тос-Бөрү" каттыжыышкыны 2021 чылдың август 3-те күрүне бүрүткелин алганын дыңнаткан. “Тожу кожууннуң общиналарындан каттыжар талазы-биле дөрт билдириишкин бөгүн биске кирген” – деп, Никитин тодараткан.
Ассоциация хөй-ниити организациязы болур болгаш, кижиниң эргелери база тожу тываларының сонуургалдары дээш туржуп, социал болгаш экономиктиг айтырыгларны, долгандыр хүрээлел камгалалын, культура хөгжүлдезин база өөредилге айтырыгларын шиитпирлээр сорулгалыг.