Тывада август 1-ден электроэнергия өртээ эвээжээн

03.08.2021 Август 1-ден эгелеп, Тывада юридиктиг черлер болгаш чон чырык өртээн эвээжеткен тариф-биле төлеп эгелээн. Юридиктиг черлерге чырыктың өртээ июль 1-ден 28% кызырылган. Тываның Чазаа бюджет албан черлериниң электри энергиязынга чарыгдалдарындан камналганы чурттакчы чоннуң төлевирлерин эвээжедиринче угландырар деп шиитпирлээн. Ындыг болганда, республиканың чурттакчылары август 1-ден чырыкты ажыглааны дээш төлевирни 9% эвээшке төлеп эгелээр. 30 чылдың иштинде чырык энергиязының өртээнге ындыг эвээжээшкин бир дугаар чедип алдынган.
Россия Федерациязының Чазааның 2021 чылдың май 27-де № 1384-р айтыышкыны езугаар, 2021 чылдың июль 1-ден Тывада юридиктиг черлерче чырык энергиязын дамчыдар ачы-дузаның өртээнге үстүкү деңнел эвээжээн. Юридиктиг черлерге чырык энергиязының тариви планнаан өртекке онааштыр 28 хуу кызырылган, азы 2,3 рубль.
Тарифтер талазы-биле албанның санааны болза, республиканың база муниципалдыг бюджет албан черлериниң болгаш республиканың шупту юридиктиг черлериниң, бүдүрүлгелериниң база сайгарлыкчыларының чырык энергиязынга дээш төлевир чарыгдалдары эвээжээр ужурлуг.
Тыва Республиканың Чазаа республика бюджединден акшаландырар албан черлериниң чырык энергиязы дээш чарыгдалдарынга камналганы энергия садып-саарар компанияларның чидирген орулгаларын улаштыр эгидеп бээри-биле, чурттакчы чонга чиигелделиг тарифти ажыглавышаан төлевирни бичииледиринче угландырган.
Ынчалдыр, 2021 чылдың июль 1-ден газтыг бажыңнарда чурттап турар чонга чиигелделиг өртек - шакта кВт дээш 4,01 рубль турганындан 3,65 рубль апарган, а чырык-биле ажылдаар плиталарлыг база көдээ черлерде бажыңнарга чырыктың өртээ 2,80 рубль турган болза, ам - 2,55 рубль. Тарифтер планнаан өртектен 9% азы 0,36 биле 0,25 рубльге эвээжээн.