2021 чылдың бирги чартыында национал төлевилелдерниң Тывада кайы хире күүсеттингенин түңнээн

28.07.2021 Тываның Чазаанда төлевилел ажыл-чорудулгазының эргелели бо чылдың бирги чартыында республикада национал төлевилелдер күүселдезиниң түңнелин үндүрген.
11 национал төлевилелдер (Россияда – 13) иштинде 43 регион төлевилелин (Россияда – 70) 2021 чылда регион боттандырып, 121 тускай сорулгалыг көргүзүгнү база 120 түңнел көргүзүгнү доктааткан.
2021 чылдың республика бюджединде национал төлевилелдер боттанылгазынче 4264,2 млн. рубльди, ооң иштинде федералдыг бюджет акша-хөреңгизинден – 4138,6 млн. рубльди, республика бюджединден – 125,6 млн. рубльди тускайлаан. Акшаландырыышкынның хөй кезии «Демография» национал төлевилелге онаажыр, ниити акшаландырыышкын хемчээлиниң – 41,1%. Ол акша-хөреңги колдуунда ажы-төлдүг өг-бүлелерге саң-хөө деткимчезин көргүзеринче угланган.
2021 чылдың июль 1-ге чедир, национал төлевилелдер акшаларының касса күүселдези чылда көрдүнгениниң 34,6 хуузу болган. «Делегей кооперациязы болгаш экспорт» болгаш «Чурагайлыг экономика» национал төлевилелдер талазы-биле саң-хөө шиңгээдилгезин бо чылдың 3-кү кварталында планнаан. «Күш-ажылдың бүдүрүкчүлүү» нацтөлевилел акша чок.
2021 чылдың бирги чартыында планнаттынган 56 тудугнуң 43 чаа объектизинде тудуг, чаартылга болгаш септелге ажылдары эгелээн (Тере-Хөл кожууннуң Кунгуртуг сумузунда уруглар сады, Хайыраканда бажың-интернаттың ийи чуртталга корпузу, 12 автооруктарның септелгези, алды көдээ культура бажыңнарының капитал септелгези, хөй-ниити девискээрилерниң 20 объектизин чаагайжыдары, Шагаан-Арыг хоорайда суг чыыр черни база Кызыл хоорайның “Южный” микрорайонунда ийиги чергениң инженер четкилерин чаартыры). Бо хүнде үш объектиде ажылдар доозулган.
Чүгле 2021 чылда 81: эрткен чылдан дамчып келген 25, чаа 56 объектини национал төлевилел күүселдези-биле септеп, чаартып, тудары планнаттынган.