Тывада Covid-19-тан аарыыр чорук чавырылза-даа, эпидемиологтуг байдал нарын болуп артпышаан

28.07.2021 Тыва Республиканың Чазааның даргазының албан хүлээлгезин күүседип турар Саида Сенгииниң удуртканы оперативтиг штаб хуралында, Тываның кол санитар эмчизи Людмила Салчак республикада коронавирус аарыы бадып эгелээнин илеткээн. Бир хүнде аарып турар кижилерниң саны 1,6 хуу кызырлып турар-даа болза, ниити эпидемиологтуг байдал нарын. Киирген кызыгаарлашкын чурумнарын долу сагывайн турарындан, ол сан-чурагай оон өзүп болур.
Росхереглелхайгааралының удуртукчузу чамдык муниципалдыг кожууннарда - Тес-Хемде – 225, Эрзинде – 460, Таңдыда – 114, Тожуда – 386, Чеди-Хөлде – 96 түү чедир ажыглаттынмаан вакциналар артканын дыңнаткан. Ынчангаш вакциналарны бүрүнү-биле ажыглаар хемчеглерни чорударын кожуун удуртукчуларынга сагындырган.
Людмила Салчак оон аңгыда, ачы-дуза чедирилгезиниң адырында тарытпаан кижилер ам-даа хөйүн айыткан. Муниципалитеттер удуртукчулары сайгарлыкчыларның база оларда ажылдап турар кижилерниң долу тарылганы салдырып алырын хайгаараарын сүмелээн.
Хөй-ниитиниң чемнелге объектилеринче рейдилерни чорудуп турзажок, Кызылдың солагай талакы дачалар ниитилежилгезиниң девискээринде хөй кижи чыылган хемчегни эрттирип, санитар-эпидемиологтуг чурумнарны хажыдыткан таварылга илереттинген.
Ол ышкаш Таңды кожууннуң хөлдеринде база Чаа-Хөлде сугларже кижилер барып эгелээн дугайында дыңнадыглар келгенин ол дыңнаткан. Чагырга черлери чурум үрекчилеринге хамаарыштыр боттуг хемчеглерни алырын негээн.
Тываның кадык камгалал сайыдының бирги оралакчызы Марианна Куулар эрткен хүнде коронавирустаан 174 кижи илереттинген деп, дыңнаткан. Стационарда 1486 аарыг кижи эмнедип чыдар, поликлиникаларда - 5332 кижи, амбулаторлуг эмнээшкинде – 2329 кижи. 314 кижиниң байдалы берге, ИВЛ-де – 35 кижини кошкан. Республикада коронавирустан аараан 1528 бичии уруглар бар, оларның 1460-ы – амбулаторлуг эмнээшкинде, 68-зи – стационарда чыдар. Оруннар фондузунуң 16,2% хостуг.
Июльдуң 26-да Тывада амбулаторлуг эмнээшкинде аарыг кижилерге дээш 16 млн рубль ниити түңге эмнер аймаа келген. Бо чоокку хонуктарда 20 млн рубльге стационарда аарыг кижилерге дээш эмнер келир.
Чүгле чаңгыс катап салыр Спутник-Лайт деп 1720 түү вакцина республикада келген. Спутник-V деп 1443 түү вакцина ам-даа бар.
Июль 27-ниң хүнүнге чедир вакцинаның бирги кезээн 82 591 кижи алган (67,3%), ийиги кезекти 61 263 кижи салдырткан (49,3%), оларның 12 200-зү 60 хардан өрү назылыг кижилер.
Республиканың Өөредилге яамызы июль 27-ге чедир ведомство иштинде 31 албан черлеринде ажылдап турарлардан 1083 кижи бирги тарыышкынны эрткен болза, 1236 кижи ийиги тарылганы алган. Өөредилге организацияларында ажылдакчыларның 40 хире хуузу долу тарыткан.