Тываның абитуриентилери-биле тускайлаан олуттарже 919 керээни чарган

22.07.2021 Тыва Республиканың Өөредилге болгаш эртем яамызының медээзи-биле алырга, республиканың болгаш Россияның дээди өөредилге черлеринче улаштыр дужаап кирер кылдыр абитуриентилер-биле 919 тускай олуттарлыг керээлерни 2021 чылдың июль 20-ге чедир чарган. Ниити чардынган керээлерниң 464-үн школа доозукчулары, 303-үн – профессионал өөредилге организацияларының доозукчулары, 152-ин - эрткен чылдарның доозукчулары долдурган.
Тываның күрүне университеди тускай сорулгалыг олуттарга өөренир конкурска киржир кылдыр 196 керээни университеттиң абитуриентилери-биле чарган.
Алызында ажыл берикчилери болур республиканың дараазында ведомстволары тускай сорулгалыг өөредилге конкурузунга киржир абитуриентилер шилилдезин чарлаан:
- ТР-ниң Кадык камгалал яамызы;
- ТР-ниң Өөредилге болгаш эртем яамызы;
- ТР-ниң Юстиция яамызы;
- ТР-ниң Информатизация болгаш харылзаа яамызы;
- ТР-ниң Орук-транспорт комплекизиниң яамызы;
- ТР-ниң Культура яамызы;
- Тыва Республиканың ХК база ОБ талазы-биле албаны;
- ТР-ниң Даштыкы экономиктиг харылзаалар база туризм талазы-биле яамызы.
Россияның дээди өөредилге черлериниң үнүүшкүннүг хүлээп алыышкын комиссияларының төлээлери чылдың-на Республиканың хүлээп алыышкын комиссиязының ажылында киржип турар. Бо чылын абитуриентилер Россияның 10 дээди өөредилге черлеринче база бир ортумак профессионал өөредилге черинче документилерин дужаап болур:
- Бурятияның көдээ ажыл-агый академиязы;
- Бурятияның күрүне университеди;
- Профессионал өөредилгениң ырактан өөредир немелде өөредилге институду;
- Кузбасстың көдээ ажыл-агый академиязы;
- Академик М.Ф. Решетнев аттыг Сибирьниң күрүнениң эртем болгаш технологиялар университеди;
- Сибирьниң федералдыг университединиң Шериг-инженер институду;
- Сибирьниң федералдыг университединиң хамааты мергежилдер институттары;
- Сибирьниң федералдыг университединиң Саян-Шушенский филиалы;
- Г. В. Плеханов аттыг Россияның экономиктиг университединиң Улан-Батор хоорайда филиалы;
- Алтайның күрүне университеди;
- Ачинскиниң транспорт болгаш көдээ ажыл-агый колледжизиниң Малиновкада салбыры.
Республиканың хүлээп алыышкын комиссиязы 2021 чылдың июль 24-ке чедир Кызыл хоорай, Калинин кудумчузу, 1 дугаарлыг бажыңда Тываның Тудуг техникумунда ажылдап турар. Харылзажыр телефону - 8 (901) 644 1590.