«Россия Федерациязының чурагайлыг экономиказы» национал төлевилел боттанылгазы-биле Тываның ыраккы сууру Тоолайлыгны интернетке кошкан

26.07.2021 Тываның Информатизация болгаш харылзаа яамызы республиканың чедери берге эң ыраккы сууру – Мөңгүн-Тайга кожууннуң Тоолайлыг сумузунче оптиктиг удазынны шөйерин дооскан деп дыңнаткан. «Россия Федерациязының чурагайлыг экономиказы» национал программаның «Информация инфраструктуразы» федералдыг төлевилелге регион киришкеш, интернетке коштунар аргалыг болган. Бо чоокку үеде Тоолайлыг суму чагыргазынга, ниити өөредилге школазынга база фельдшер-акушер пунктузунга интернет көстүп кээр.
«Амгы делегейниң хөгжүлдезинче чаа идигни болгаш базымны берген дүрген дамчыыр интернеттиг болганывыска канчаар-даа аажок өөрүп тур мен. Ам бистиң эвээш санныг чонувус суурдан дашкаар үнмейн, күрүне ачы-дузазының порталын, өөредилге программаларын болгаш өске-даа электроннуг шөлчүгештерни ажыглап эгелээри өөрүнчүг-дүр» - деп, Тоолайлыг суму чагыргазының специализи Вера Прокудина чугаалаан.
Сөөлгү ийи чылда Тывада чурттакчылыг 139 черлерже харылзааның 720 км волокно-оптиктиг шугумун шөйген. 2021 чылда интернетке социал ужур-дузалыг ам-даа 193 объектини кожар, ооң 81-ин кошкан бооп турар.