Күрүне Думазының депутады Лариса Кужугетовна Шойгу мөчээн

Л.К. Шойгу 1953 чылдың январь 21-де Чадаана хоорайга төрүттүнген, Томскиниң эмчи институдун дооскаш, психиатр эмчи бооп күш-ажылчы базымын эгелээн. 1976-1998 чылдарда республиканың психиатрия эмнелгезинге, 1998 чылдан Тыва Республиканың кадык камгалал яамызынга сайыттың оралакчызы бооп ажылдаан. 1998-2007 чылдарда Москвада Россияның ОБЯ-зының эмнелге кезектериниң эмчизи. Россия Федерациязының Федералдыг Хуралының Күрүне Думазының V- VII чыыштарының депутады болуп “Чаңгыс демниг Россия” политиктиг партияның федералдыг даңзызының составындан Тыва Республика, Хакасия, Красноярск крайны төлээлеп, чаңгыс эвес удаа соңгуткан. 2007 чылдың декабрь 2-ден тура Күрүне Думазының кадык камгалал комитединиң кежигүнү, регламент болгаш ажыл организастаар комитединиң оралакчы даргазы чораан. 

Л.К. Шойгу федералдыг бюджет болгаш өске-даа чугула хоойлу төлевилелдеринге Тыва Республиканың Чазаан деткип, Тываның хөй-ниити амыдыралынга идепкейлиг киржип, Кужугет Шойгу аттыг культура фондузун таварыштыр номнар үндүрер хөй санныг солун төлевилелдерни эгелээн. Лариса Кужугетовна кижизиг, тоомча чок эвес сеткилдиг база дузааргак мөзү-бүдүжү-биле чаңгыс чер-чурттугларының ынакшылын болгаш хүндүткелин чалап алган. 

Тываның Баштыңының албан-хүлээлгезин түр үеде күүседип турар Владислав Ховалыг Россия Федерациязының камгалал сайыды Сергей Шойгуга, кады төрээннеринге база чоок кижилеринге Лариса Шойгунуң мөчээни-биле кажыыдалын илереткен. Социал четкилерде арнында ол дугайында мынча деп бижээн. 

“Москвадан муңгаранчыг медээ келди. Лариса Күжүгетовна Шойгу кезээ мөңгеде бистен чарлып чоруткан-дыр. Ол тыва черге төрүттүнгеш, ажылчы базымнарын бөдүүн эмчиден эгелээш, Кадык камгалал яамызының удуртукчуларының бирээзинге чедир ажылдаан, Күрдуманың үшкү чыыжының депутады турган. Тываның берге айтырыгларын шиитпирлээринге кезээде киржип, ол ажылче депутат коллегаларын хаара тудуп чораан. Кызыл хоорайның мэри тургаш, Лариса Кужугетовна-биле ужуражылгаларны сактыр-дыр мен. Ол бистиң, хоорай удуртукчуларының, бөдүүн чоннуң берге айтырыгларын кичээнгейлиг дыңнап алыр, кезээде дузалаарын кызыдар база дузалап чораан. Чоокта чаа «Чаңгыс демниг Россия» партиязының баш бурунгаар соңгулдаларынга соңгукчулар база катап аңаа бүзүрелин көргүскен. Ооң амыдыралчы сорулгалары-даа, бистиң ынаныжывыс-даа боттанмазы ол-дур, хомуданчыг. Эглип келбес улуг чидириг-дир. Чыдар чери чымчак болзун. Сергей Кужугетовичиге, төрел-дөргүлүнге база чоок кижилеринге эң-не ханы кажыыдалы илередип тур мен. Лариса Кужугетовна онзагай, чараш, эки сеткилдиг кижи чораан. Ол бистиң чүректеривиске кезээ мөңгеде артар”.