Тыва суг үериниң чаа чадазынга белеткенип эгелээн

ТР-ниң бирги вице-премьери Олег Бады оперативтиг байдалды Владислав Ховалыгга таныштырган. Регионнуң элээн каш оруктарын үерлээн суг алган. Каа-Хем кожуунда ийи көвүрүг сугда.  Бүрен-Аксы – Элегес-Аксы – Кунгуртуг аразында автокыштаг сугга алысканы демдеглеттинген. Кызыл, Өвүр база Таңды кожууннарда хемнер савазын ажып, эрикче үнген. Суг бада бээрге, оруктарның септелгезин эгелээр. 

Гидрометеорология төвү республиканың хемнер-сугларынга часкы үерлээшкинниң ээлчеглиг чалгыы ам-даа уламчылаарын дыңнаткан. 

 «Кызыл кожуунда эриктиң 1 хире киломертинде чалды быжыглаан. Сай-довуракты төп, эрик кыдыын бедиткен – деп, Олег Бады илеткээн. – Даглар бажында харның кылыны ам-даа 2 хире метр. Ындыг болганда, июньнуң 10-дан 25-ке чедир үерниң ийиги чадазын манап турар бис».

Тываның Баштыңының албан-хүлээлгезин түр када күүседип турар В.Ховалыг онза байдалдарны болдурбас база чайладыр девискээр албаннарны кезээде белен болурун, суг объектилеринге байдалды хынаарын, суг дамчыдар база гидротехниктиг дериг-херекселдерни хайгааралга алыр даалганы тускай ажылдыг органнарга дааскан. Бир эвес байдал нарыыдап келзе, чурттакчы чонга дыңнадыр системаның, ол ышкаш түр када чурттаар черлерниң белен турарынга немелде акшаландырыышкынны тускайлаарын айыткан.