Газ үлетпүрүнүң удуртулгазы-биле ажыктыг ужуражылгаларны эрттирген

Бо хонуктарда Москва хоорайга ажыл-албан аайы-биле сургакчылап турган Тываның Баштыңының албан-хүлээлгезин күүседип турар Владислав Ховалыг республикада суг халавы нарыыдааны-биле, Тывазынче чанар ужурга таварышкан. Ооң дугайында социал четкилерде дыңнатпышан, Москвага сургакчылаашкынын бижээн. 

 “Москвага сургакчылаашкын үре-түңнелдиг болган. Элээн каш федералдыг албан черлеринге чедип, Тываның хөгжүлдезинге хамааржыр ажыктыг ужуражыышкыннарны чоруттум. Күрүне эргелеп-башкарылгазының Дээди школазының бо удаада Санкт-Петербург хоорайда эртип турар солун болуушкуннарынга база ажыктыг таныжылгаларынга кириштим. Мээң чаңгыскурсчуларым аразында сайыттар, улуг компанияларның топ-менеджерлери, арга-дуржулгалыг күрүне ажылдакчылары дээш кымнарны чок дээр. Олар-биле албан-ёзунуң эвес чугаалажыышкыннар үезинде безин республиканың чидиг айтырыгларын шиитпирлээриниң аргаларын чугаалажып турдувус.

 «Газпром» ажык акционерлиг ниитилелдиң директорлар чөвүлелиниң даргазының оралакчызы - баштаар чериниң даргазы Алексей Миллер-биле чугаалаштым. 2021 чылдан 2025 чылга чедир Россияның регионнарын газчыдар ниити программаже Тыва кирбээнин билир силер. Ынчалзажок социал газчыдылганың шенелде төлевилелиниң киржикчизи апаар арга барын “Газпромга” хамааржыр “Газпром межрегионгаз” КХН-ниң чиңгине директору Сергей Вадимович Густов-биле сайгарып көрдүвүс. Кожавыста Томск хоорайда бойдус газын суугадыр заводту ажылдатканы-биле ук арганы боттандырып болур хевирлиг.

 Иркутск областың губернатору-биле Ангара-Енисей макрорегионнуң иштинге бистиң кады ажылдажылгавысты канчаар тургузуп алырын чугаалаштывыс. 

 Республикада үер байдалы нарыыдаан. Ынчангаш кадр курлавырының школазынга өөредилгемни үзер ужурга таварыштым. Регионда байдалды бодум көргеним соонда, федералдыг яамыларның удуртукчулары-биле ужуражылгаларны база ара үскен өөредилгемни уламчылаар мен”.