Тывада 68 муң ажыг өөреникчилер күрүнеден 10 муң рубльдиң деткимчезин алыр

16913 долу эвес өг-бүлелерде 8-тен 16 харлыг уруг бүрүзүнге 6106,5 рубль акшаны төлеп эгелээр. Школаже белеткээр кылдыр 68911 ажы-төлдүң ада-иелеринге чаңгыс удаа бээр 10 муң рубльди 2021 чылдың августа төлээр. Оон аңгыда иштиг херээженнерге бээр ай санының пособиезин өстүрген. 

Тыва Республиканың Күш-ажыл болгаш социал политика яамызы 2021 чылда уругларга чаа төлевирлерни, ону төлээриниң негелделерин дыңнаткан. Чааскаан 8-16 харлыг ажы-төл азырап олурар ада, иелер ай санында 6106,5 рубльди алыр. Суд шиитпири-биле алимент ап турар ада, ие база ону ап болур. Өөнүң ишти чок апарган, азы ис чок читкен ийикпе, чаш төлдүң төрүттүнген херечилелинде адазын айытпаан ада-ие ол деткимчени алыр. 2021 чылдың июль 1-де төлевирлер эгелээр. 

Баш бурунгаар санаашкыннардан алырга, республикада 16913 долу эвес өг-бүлелер бар, ында 29765 ажы-төл кижизиттинип турар. Пособие дээш билдириишкинни социал камгалал органы, МФЦ азы «Госуслуги» портал таварыштыр кирер. Бо чылын бирги классче кирер өөреникчи бүрүзүнге 10 муң рубльдиң чаңгыс катап бээр төлевири көрдүнген. Чаа өөредилге чылынга белеткензин дээш бо чылдың августа акшаларны шилчидери – төлевирниң кол утказы. 

ТР-ниң Өөредилге болгаш эртем яамызының сан-чурагайы-биле алырга, 68911 школачыга чаңгыс катап бээр акшаларны төлээр. Пенсия фондузу - төлевир дээр харыылаар орган ол. Россияның Пенсия фондузунуң Тыва Республикада салбыры ТР-ниң Өөредилге яамызындан, ТР-ниң ХБАБ эргелелинден медээлерни чыып, баш бурунгаар санаашкыннарны кылган. 

7 харга чедир ажы-төлү аараан дээш ажыткан эмнелге хуудузун шалыңның 100 хуузу кылдыр төлээр. Күш-ажыл керээзи-биле ажылдап турар, чеди хар чедир уруглуг ада-иелер 100 хуу хемчээлдиг пособиени алыр. Социал камгаладылга фондузунуң акша-хөреңгизинден эмнелге хуудузун төлээр.

 Амыдыралдың берге байдалында база эртежик учетта туруп алган иштиг херээженнер бүгү чуртта ортумаа-биле көрдүнген акша - 6350 рубльди ай санында алыр. Бо хүннерде ол акша район хуузу-биле кады санаарга 945,21 рубльга дең. А Тожу, Мөңгүн-Тайга, Тере-Хөл кожууннарда ажылдап турарларга ону 50 хуузу-биле кады санаарга 1012,73 рубль болур. Амыдырап-чурттаарының кудуку хемчээлинден эвээш орулгалыг херээженнер 6 неделя иштиг тургаш-ла (12 неделяга чедир) учетта туруп алыр болза, пособиени алыр. 

«Госуслуги» сайт таварыштыр онлайн хевирге билдириишкинни хүлээр. Россияның Пенсия фондузу төлевирни төлээр. Пособиениң хемчээли иштиг херээженниң чурттап турар регионунда амыдырап-чурттаарының кудуку хемчээлиниң чартыы хире болур. Россияда ол ортумаа-биле 6350 рубль. Иштиг дээш учетка турган хүнден эгелээш, божуур хүнүнге чедир ай санында ону төлээри планнаттынган. Келир үениң 6 муң хире иелери материалдыг немелде ол деткимчени алыр.